မဲခေါင်၊ ဇူလိုင် ၁
ရှမ်းမြောက်၊ ကျောက်မဲမြို့ပေါ်ကို စစ်ကောင်စီက ညလုံးပေါက်နီးပါး လေယာဉ်နဲ့ ပေါင် ၅၀၀ ဗုံးကြဲလို့ ဟိုတယ် ၁ လုံးအပါ နေအိမ် ၁၅ လုံးမက မီးလောင်ပျက်စီးခဲ့တယ်လို့ ဒေသခံတွေဆီက သိရပါတယ်။
မနေ့ ဇွန်လ ၃၀ ရက် ညပိုင်းမှာ ကျောက်မဲမြို့ပေါ်ကို စစ်ကောင်စီက လေယာဉ်နဲ့ ပေါင် ၅၀၀ ဗုံးကြဲလို့ ရပ်ကွက်-၁ မှာရှိတဲ့ One Love ဟိုတယ်နဲ့ အနီးဝန်းကျင်က အိမ်တွေ ၁၅ လုံးကျော် မီးလောင်ပျက်စီးခဲ့တယ်လို့ သိရပါတယ်။
“ဟိုတယ်နောက်က အထပ်မြင့်က ပြိုကျတယ်၊ တောင်ဘက် ဂဠုန်ပျံသောင်းသောင်းအိမ်ကနဲ့ မြောက်ဘက်က ကျောင်းဆရာ ဦးမြမောင်အိမ်တွေ မီးလောင်တယ်၊ ရှေ့က ခရိုင်ရုံးနဲ့ မြို့တော်ခန်းမ၊ မီးသတ်ရုံးတွေလဲ မှန်တွေကွဲ တံခါးတွေပွင့်ထွက်ပြီး ပျက်စီးကုန်တယ်၊ လူအသေအပျောက်တော့ မသိရသေးဘူး၊ ညက တိုက်ပွဲသံကြားထဲ မီးဖွားဖို့ အခက်ကြုံနေတာကို တိလင်ရပ်ကွက်မှာ ဆရာမက မီးဖွားပေးလိုက်နိုင်တယ်”လို့ ကျောက်မဲ ရပ်ကွက်-၂ ဒေသခံ ၁ ဦးက မဲခေါင်သတင်းဌာနကို ပြောပါတယ်။
အခြားသတင်းအရ ရပ်ကွက်-၃ အထိ မီးကူးစက်လောင်ပြီး အမျိူးသား ၃ ဦးဒဏ်ရာရခဲ့တာရှိတယ်လို့ ဒေသခံတွေက ပြောပါတယ်။ မီးဟာယနေ့မနက်အထိ အနည်းငယ် လောင်နေဆဲဖြစ်တယ်လို့ သိရပြီး ကျောက်မဲမှာ MPT ဖုန်းလိုင်းပဲ ရတော့ကာ မြို့ပေါ်ကို TNLA က မနက် ၆ နာရီ ည ၆နာရီထွက်ချိန် ကန့်သတ်လိုက်သလို စက်သုံးဆီကိုလဲ ခွင့်ပြုချက်နဲ့သာရောင်းချပေးရန် အမိန့်ထုတ်တယ်လို့ သိရပါတယ်။ ညမထွက်မရ အမိန့်ကို လမ်းဆုံလမ်းခွတွေမှာ လိုက်ကပ်တာတွေ တွေ့ရတယ်လို့ သိရပါတယ်။
ကျောက်မဲမြို့နယ်မှာ စစ်ရှောင်စခန်း လက်ရှိမှာ ၂၁ ခုရှိနေပြီး စစ်ရှောင်ဦးရေ ၇၀၀၀ ကျော်ရှိနေကာ အဓိက ဆန်နဲ့စားစရာပြတ်လတ်ပြီးကျန်းမာရေး အကူအညီလိုအပ်နေတယ်လို့ သိရပါတယ်။
စစ်ရှောင်ဦးရေစာရင်းမှာ နေမာင်အန်း ၂၅၀၊ ချောင်းချောက် ၈၀၀၊ လွယ်ခေါ် ၁၅၀၊ နားခေါ် ၂၀၀၊ ဗူးခါး၊ ၇၀၊ ခိုတင့် ၄၈၊ ရှမ်းကျောင်းကြီး ၈၀၊ရန်ကင်းဓမ္မာရုံ ၁၀၀၊ တိလင်ဘုန်းကြီးကျောင်း ၂၀၀၊ ခိုမုန်း ၁၅၀၊ ခိုခမ်း ၃၅၀၊ ပေါက်အင်းလေး၊ ၇၅၊ စခန်းသာ ၂၅၀၊ နောင်ပိန်ဓမ္မာရုံ ၃၂၀၊ ကျွဲကုန်း ၁၀၀၊ နောင်ပိန်လေး ၃၇၀၊ နားဗုံ ၄၀၀၊ နားပြိန်း ၁၀၅၀၊ နားတောင်း ၁၇၀၊ ပုံဝိုး ၇၀၀၊ ပန်လော ၁၅၀၊ ခဲမွန် ၆၀၊ ရှဲဂွီ ၂၀၀ တို့ဖြစ်ကြပြီး အချို့စခန်းတွေမှာ လူများလို့ လက်မခံနိုင်တော့တဲ့အခြေအနေရှိနေကြတယ်လို့ ပြောပါတယ်။
လတ်တလောမှာ ရဲရွာ ဒုဌဝတီဘက် သွားနိုင်ပေမယ့် စစ်တပ်က ပိတ်ပင်လိုက်တယ်လို့ သိရပေမယ့် အတည်မပြုနိုင်သေးပါဘူး၊ နမ့်လန်ဘက်ကိုတော့ တချို့ သွားလာနေဆဲလို့သိရပါတယ်။
ရှမ်းမြောက်၊ ၁၀၂၇ စစ်ဆင်ရေးအပိုင်း(၂)တကျော့ပြန်တိုက်ပွဲကာလ (၇)ရက်ဖြစ်တဲ့ ယနေ့ ဇူလိုင်လ ၁ ရက် မနက် ၅ နာရီက စပြီး ကျောက်မဲက စစ်စခန်းတွေဖြစ်ပြီး စခန်းပတ်ပတ်လည်တွေမှာ မိုင်းလုံးရေ ၇၀၀ ကျော်ချထား တဲ့ စကခ-၁၊ ခမရ-၅၀၁၊ ၅၀၂ တွေကို TNLA နဲ့PDF တွေပူးပေါင်းကာ အပြင်းအထန်တိုက်ခိုက်နေဆဲလို့ သိရပါတယ်။
MK-012
