မဲခေါင် မေ ၂၃
လွိုင်ကော်အကျဉ်းထောင်မှာ ထောင်ဝင်စာဖြတ်ခံရတဲ့ ၆ လကျော်အတွင်း လူ ၅ ဦးထက်မနည်း သေဆုံးခဲ့ပြီး စိတ်ဓါတ်ကျပြီး ကိုယ့်ကိုယ်ကိုယ် အဆုံးစီရင်သူတွေရှိနေတယ်လို့ နိုင်ငံရေးအကျဉ်းသားဟောင်းတွေဆီက သိရပါတယ်။
အရင်က မနက်စာ ထမင်းကြော်၊ နေ့လည်စာ ပဲဟင်းနဲ့ တစ်ပတ်မှာ အသား ၄ ကြိမ်ကျွေးရာကနေ ထောင်ဝင်စာဖြတ်ထားတဲ့ ၆ လကျော်ကာလအတွင်း လူ ၁၀ ယောက်စာအတွက် ထမင်းနဲ့ ငပိရည်တစ်ဇွန်းပဲ ရရှိတော့တယ်လို့ ဆိုပါတယ်။
အကျဉ်းသားတွေကို အဟာရလျှော့ချပြီး နောက်ပိုင်း အကျဉ်းသားတွေ အဟာရလုံလောက်အောင် မရရှိတာကြောင့် ကျန်းမာရေးချို့တဲ့သူများလာသလို အဟာရချို့တဲ့ပြီး သေဆုံးတာတွေ ရှိနေတာပါ။
နိုင်ငံရေးအကျဉ်းသားဟောင်း ဖြစ်တဲ့ ကိုထားဖိုက “သူတို့ အနေနဲ့ ထောင်တိုင်းကို ရိက္ခာခွဲဝေတဲ့စနစ် ရှိတယ်ပေါ့နော်၊ အကျဉ်းသားတစ်ယောက်ကို အသားက ဘယ်လောက် ထမင်းက ဘယ်လောက်ဆိုပြီး ကျွေးရမယ်ဆိုတာမျိုး ရှိတယ်ပေါ့၊ အခုက သူတို့ဘက်က အဟာရကို လျှော့လိုက်တဲ့အပြင် ထောင်ဝင်စာကလည်း ဖြတ်ထားတော့ ရှိတာလေးနဲ့ပဲ စားနေရတာပေါ့နော်၊ အကုန်လုံးက ငပိရည်နဲ့ ထမင်းကြမ်းပဲရတော့ အဟာရချို့တဲ့ပြီး ရောဂါဖြစ်ကြတယ်ပေါ့နော်” လို့ ပြောပါတယ်။
လတ်တလော အဟာရ လုံလောက်အောင် မရရှိတဲ့ နောက်ဆက်တွဲ အနေနဲ့ ဝမ်းရောဂါ၊ အောက်ပိုင်းချိနဲ့တဲ့ရောဂါ၊ လေဖြတ်ရောဂါ၊ နာတာရှည်ရောဂါတွေ ကြုံနေရသူ ၂၀ ကျော်ခန့် ရှိပြီး လုံလောက်တဲ့ ဆေးကုသမှုလည်း မရရှိကြဘူးလို့ ထောင်နဲ့ နီးစပ်သူတွေဆီက သိရပါတယ်။
“ဒါက စစ်ဖြစ်နေတဲ့ ကာလဆိုတော့ အကျဉ်းသားတွေရဲ့ ရှင်သန်ရပ်တည်နိုင်ရေးကို သက်ဆိုင်ရာအဖွဲ့အစည်းတွေ၊ နိုင်ငံရေးဦးဆောင်သူတွေက တာဝန်ယူရမှာပေါ့၊ စစ်ပွဲကာလဆိုတော့ အချင်းချင်း ညှိနှိုင်းရခက်တဲ့ ကာလတွေမှာ ကြားခံညှိနှိုင်းပေးမယ့် နိုင်ငံတကာ အဖွဲ့အစည်းတွေလည်း လိုအပ်တာပေါ့နော်၊ အခုဆိုရင် အာဏာသိမ်းစကတည်းက အခုထိ နိုင်ကျဉ်းတွေအတွက် ဘယ်အဖွဲ့အစည်းကမှ ကူညီတာမျိုး မရှိသေးဘူး” လို့ ကိုထားဖိုက ဆက်ပြောပါတယ်။
လွိုင်ကော်ထောင်မှာ နိုင်ကျဉ်း ၁၁၀ ကျော်အပါအဝင် အကျဉ်းသား ၄၀၀ ကျော်ရှိပြီး နိုင်ကျဉ်းတွေအတွက် ကရင်နီပြည် ကြားကာလ အုပ်ချုပ်ရေးကောင်စီ(IEC)နဲ့ အမျိုးသား ညီညွတ်ရေးအစိုးရ(NUG)တို့က တစ်စုံတစ်ရာထောက်ပံ့တာမျိုး မရှိခဲ့ဘူးလို့ ဆိုပါတယ်။
၂၀၂၁ ခုနှစ် နိုဝင်ဘာလ ၂၀ ရက်နေ့တုန်းကလည်း လွိုင်ကော်ထောင်မှာ နိုင်ကျဉ်းတစ်ဦးဖြစ်တဲ့ အသက် ၁၇ နှစ်အရွယ် ဂျော့မောင်ငယ် စစ်ကြောရေးမှာ သေဆုံးခဲ့ပြီး မိသားစုဝင်တွေဘက်က အလောင်းပြန်မရခဲ့ဘူးလို့ နီးစပ်သူတွေဆီကတဆင့် သိရပါတယ်။
MK-015
