မဲခေါင်၊ မေ ၂၀
တိုက်ပွဲတွေကြောင့် မိသားစုဝင်တွေ စစ်ရှောင်ကြရလို့ ထောင်ဝင်စာ မပို့နိုင်တော့တာကြောင့် ဆန် ၊ ငါးပိနဲ့ ဆားကြမ်းကိုသာ ကျွေးမွေးစားနေကြရတယ်လို့ မြန်မာနိုင်ငံလုံးဆိုင်ရာ အကျဉ်းသားများ ကွန်ယက်(PPNM) ကသိရပါတယ်။
လွိုင်ကော်အကျဉ်းထောင်တွင်းမှာ ပုံမှန် ပဲဟင်းနဲ့ တပတ်တစ်ကြိမ်ကျွေးနေကျ အသားဟင်း(၄)တုံး ကိုပင် ထောင်က မကျွေးနိုင်တော့တာကြောင့် အဟာရချို့တဲ့နေကြတယ်လို့ သိရပါတယ်။
လွိုင်ကော်တိုက်ပွဲ အချိန်ကာလ ၆ လကျော် အသက်မသေအောင်သာ ကျွေးမွေးနေတာတွေကြောင့် အကျဉ်းသားတွေဟာ အဟာရမပြည့်ဝတာ၊ ကိုယ်လက်လှုပ်ရှားဖို့ အချိန်နည်းပါးတာတွေကြောင့် ချိနဲ့တဲ့ ထောင်အခေါ် တုတ်ဆွဲရောဂါ လေဖြတ်သလို ခံစားနေရသူတွေ များပြားလာနေတယ်လို့ ဆိုပါတယ်။
“ထောင်မှာက အပြင်အစားအသောက်က အဓိကအားထားနေရတာ၊ ထောင်ကကျွေးတဲ့ဆန်က အရင်က လုံးတီးဆို အားဖြစ်နိုင်ပေမယ့်အခုတော့ ထမင်းပုံစံရိုက်ရင် ပွအောင် ဆော်ဒါမှုန့်တွေ ထည့်ချက်တာ၊ ငါးပိဆိုရင်လဲ မြေကြီးတွေက ခပ်များများ၊ အသီးအရွက်ဟင်းဆိုရင်လဲ အရည်ထဲမှာ ဘောက်ဘတ်တို့ တီကောင်ပါလာရင်တောင်အားရှိတယ်ဆိုပြီး လွင့်မပစ်ပဲစားရတာ၊ ခုလို ဆန်၊ ငါးပိနဲ့ ဆားလောက်ပဲဆိုရင်တော့ ထောင်ထဲမှာမသေရင်တောင် ထောင်ကလွတ်ရင် ထောင်ရှေ့မြေကြီးပေါ်မှာ လွှတ်ဝါးရမ်း တင်ပြီး သေခဲ့ရတာ အများကြီး၊ ခုလွိုင်ကော်ထောင်အနေအထားကအမြန်ကယ်ပေးဖို့ အထူးလိုအပ်တယ်”လို့ မန်းထောင်မှ ကဘော်ချိုင့်ဝှမ်းစခန်းသို့ စေလွှတ်ခံရခဲ့ရပြီး မသေလို့ ပြန်လည်လွတ်မြောက်လာသူ အကျဉ်းသား တစ်ဦးက မဲခေါင်ကို ပြောပါတယ်။
၂၀၂၃ ခုနှစ်၊ နိုဝင်ဘာ ၁၁ ရက် ကစခဲ့တဲ့ ၁၁၁၁ စစ်ဆင်ရေးအတွင်း စစ်ကောင်စီနဲ့ ကရင်နီတော်လှန်ရေးတပ်ဖွဲ့တွေကြား မြို့တွင်းတိုက်ပွဲတွေဖြစ်ပွားချိန်ကစပြီး လွိုင်ကော်အကျဉ်းထောင်မှာ စစ်တပ်နဲ့ရဲတွေ တပ်စွဲနေတာ ဖြစ်တယ်လို့ သိရပါတယ်။
ကရင်နီပြည်နယ်က လွိုင်ကော်အကျဉ်းထောင်မှာ နိုင်ငံရေးအကျဉ်းသား၊ အကျဉ်းသူ ၁၁၀ ကျော်အပါအဝင် အကျဉ်းသား ၄၀၀ကျော်ဟာ အဟာရချို့တဲ့ကာ သေဆုံးနိုင်ချေများပြားနေလို့ အပြည်ပြည်ဆိုင်ရာ ကြက်ခြေနီ ကော်မတီ(ICRC) အပါအဝင် ကုလသမဂ္ဂ အဖွဲ့ဝင်နိုင်ငံတွေနဲ့ နိုင်ငံတကာလူ့အခွင့်အရေးအဖွဲ့တွေ မြန်မာပြည်သူတွေ အနေနဲ့ မမေ့လျော့နေပဲ ကြိုးပမ်းပေးကြဖို့ လိုနေတယ်လို့ မြန်မာနိုင်ငံလုံးဆိုင်ရာအကျဉ်းသားများကွန်ရက် (PPNM) က ယနေ့ မေလ ၂၀ ရက်နေ့မှာ ထုတ်ပြန်လာပါတယ်။
MK-012
