မဲခေါင်၊ မေ ၂
ရှမ်းပြည်အရှေ့ပိုင်းနဲ့ တောင်ပိုင်း ချိတ်ဆက်ထားတဲ့ အမှတ်(၄) လမ်းမကြီးပေါ် သံလွင်မြစ်ကူးတံတားအနီး လမ်းပြင်နေတာကြောင့် ဧပြီ ၃၀ ကနေ မေ ၁၀ ရက်နေ့အထိ တစ်ရက် (၄) နာရီပိတ်ထားတဲ့အတွက် ကုန်ကားနဲ့ ခရီးသည်တင်ကား ရာနဲ့ချီ ပိတ်မိနေတယ်လို့ သိရပါတယ်။
တံတားဖြတ်သန်းခွင့်ကို နေ့စဉ် မနက် (၆) နာရီကနေ ညနေ (၆) နာရီအထိ နေ့စဉ် (၁၂) နာရီသာ ဖြတ်သန်းခွင့်ပေးထားတာဖြစ်ပြီး အခု (၄) နာရီပိတ်လိုက်တဲ့ နေ့စဉ်(၈)နာရီသာ ဖြတ်သန်းခွင့် ရတော့မှာ ဖြစ်ပါတယ်။
ကုန်ကားမောင်းနှင်သူတစ်ဦးက “ဟိုတလောက ဟိုပုံးနား တိုက်ပွဲတွေဖြစ်တော့ ကားတွေအကုန်နီးပါးရပ်သွားတယ် အခု လမ်းပြန်ဖွင့်တော့ ကားတွေပြုံလာတာ အများဆုံးက ကျိုင်းတုံ-မိုင်းလား တရုတ်ကုန်သယ်တာတွေဘဲ တာချီလိတ်ကဆိုရင် ဆောက်လုပ်ရေးပစ္စည်းတွေ အခုနောက်ပိုင်း မြဝတီကသွားလို့မရတော့ မြဝတီက ကုန်တွေက တာချီလိတ်မှာ လာပုံနောတွေ လဲရှိတယ်။ လမ်းပိတ်တော့ ကားတွေ အကုန်ကြပ်ကုန်တာပေါ့ ခရီးသည်တင်ကားတွေ ရောဘဲ” လို့ မယ်ခေါင် သတင်းဌာနကို ပြောပါတယ်။
နိုင်ငံအနှံက နယ်စပ်ကုန်သွယ်ရေးဂိတ်တွေ ကုန်သွယ်လို့ မရတာကြောင့် ရှမ်းပြည်နယ်အရှေ့ပိုင်း မိုင်းလား၊ ကျိုင်းတုံ၊ တာချီလိတ်ကနေက ကုန်သွယ်နေရတာြဖစ်တဲ့အတွက် ရှမ်း/ရှေ့ကုန်သွယ်မှုလမ်းကြောင်းဟာ အရင်နှစ်တွေထက် ပိုမိုမြင့်တက်လာတာဖြစ်ပါတယ်။
မိုင်းလားကနေ တရုတ်နိုင်ငံအတွင်း တင်ပို့မှု အများဆုံးကုန်စည်တွေက ယခင် မူဆယ်ဘက်ကနေ တင်ပို့နေတဲ့ ဖရဲ၊ သရက်နဲ့ သစ်သီးတွေဖြစ်ပြီး မူဆယ်လမ်းကြောင်း ပိတ်သွားတဲ့အတွက် တရုတ်ကနေတဆင့် တင်သွင်းလာတဲ့ကုန်စည်တွေ အများဆုံး ပြည်တွင်းကို ရှမ်း/ရှေ့လမ်းကြောင်းက တင်ပို့နေတာဖြစ်တယ်လို့ သိရပါတယ်။
တစ်နိုင်ငံလုံးမှာ နယ်စပ်ကုန်သွယ်ရေးစခန်း (၁၇) ခုရှိတဲ့အနက် (၆) ခုကို တိုင်းရင်းသား လက်နက်ကိုင်အဖွဲ့ (EAOs)တွေက ထိန်းချုပ်ထားတာကြောင့် နေ့စဉ်နယ်စပ်ကုန်သွယ်မှုတန်ဖိုး ၆၀ ရာခိုင်နှုန်းကျော် စစ်ကောင်စီက ဆုံးရှုံးသွားပြီး ယခင်က နေ့စဉ်ကုန်သွယ်မှုတန်ဖိုးဟာ အမေရိကန်ဒေါ်လာ (၂၃) သန်းကျော်ရှိတယ်လို့ ISP Myanmar ရဲ့ အစီရင်ခံစာထုတ်ပြန်မှုအရ သိရပါတယ်။
MK-002
