မဲခေါင်၊ ဧပြီ ၈

ရှမ်းပြည်တောင်ပိုင်း၊ ညောင်ရွှေမြို့နယ်၊ စိုက်ပျိုးရေးရွာမှာ အသက် ၁၈ ကနေ ၃၅ နှစ်အတွင်း အမျိုးသားအားလုံးကို အလှည့်ကျကင်းစောင့် တာဝန်ချထားတယ်လို့ ရွာခံတွေက ပြောပါတယ်။

အုပ်ချုပ်ရေးမှူး လက်အောက်ခံ ရာအိမ်မှူး ကိုမိုးကျော်နဲ့ ကိုစိုးနိုင်တို့က ဧပြီလ ပထမအပတ်ခန့်မှာ တာဝန်ချမှတ်ထားတာ ဖြစ်ပြီး ပျက်ကွက်သူတွေဟာ ဒဏ်ငွေ တစ်သောင်းကျပ် ပေးဆောင်ရတယ်လို့ ဆိုပါတယ်။

ရွာခံ အမျိုးသား တစ်ဦးက “ဘယ်သူမှ မစောင့်ချင်ပေမယ့် စောင့်ရတာပေါ့လေ။ မနက်အလုပ်သွားစရာ ရှိတဲ့လူတွေ၊ ညဘက် အလုပ်ပင်ပန်းတဲ့ သူတွေကျတော့ တစ်သောင်းပဲ ပေးလိုက်တာပေါ့။ အဲပိုက်ဆံကလည်း နောက်ဆုံး သူတို့ အိတ်ထဲပဲ ရောက်တာ” လို့ ပြောပါတယ်။

အခုကောက်ခံတဲ့ တစ်သောင်းကျပ်ဟာ စစ်ကောင်စီတပ်က ကောက်ခံခိုင်းတာ မဟုတ်ဘဲ ပျူစောထီး အဖွဲ့ဝင် ရာအိမ်မှူးတွေက ကိုယ့်သဘောနဲ့ကိုယ် ကောက်ခံကြတာလို့ ရွာခံတွေဆီက သိရပါတယ်။

ပြီးခဲ့တဲ့ မတ်လက စိုက်ပျိုးရေးရွာမှာ လောင်းကစားနဲ့ လူမှုရေးကိစ္စ အရှုပ်အရှင်းကြောင့် အမျိုးသား တစ်ဦး အသတ်ခံရပြီးနောက် အုပ်ချုပ်ရေးမှူးတွေက လုံခြုံရေးအတွက် အကြောင်းပြပြီး အခုလို အမြတ်ထုတ်နေကြတာလို့ ဆိုပါတယ်။

အုပ်ချုပ်ရေးမှူးနဲ့ နီးစပ်သူ တစ်ဦးက “စိုက်ပျိုးရွာဆိုတာ လက်လုပ်လက်စားတွေပါ။ တစ်လကို ၅ သောင်းလောက် ပေးနေရတာက မဟုတ်သေးပါဘူး။ အလုပ်မအားတော့ ကိုယ်တိုင်လည်း မစောင့်နိုင်ဘူး။ မပေးရင်လည်း ရဲနဲ့ ခြိမ်းခြောက်တယ်” လို့ ပြောပါတယ်။

စိုက်ရေးရွာမှာ နောက်ပိုင်း ရာအိမ်မှူးအဖြစ် လျာထားခြင်းခံရတဲ့ ပျူစောထီးခေါင်းဆောင် ဦးဘိုကြီးဆိုသူကလည်း ကင်းစောင့်ဖို့ အတွက် တစ်အိမ်တက်ဆင်း လူစုနေပြီး မလိုက်နိုင်တဲ့အိမ်၊ ငွေကြေးမပေးနိုင်တဲ့ အိမ်တွေကို သေနတ်ပြ မူးရူးသောင်းကျန်းနေတာကြောင့် နေ့စဉ်နဲ့အမျှ ကြောက်လန့်နေရတယ်လို့ ရွာခံတွေဆီက သိရပါတယ်။

စိုက်ပျိုးရေးရွာအတွင်း လူသတ်မှု တရားခံကို အုပ်ချုပ်ရေးမှူးတွေက လာဘ်ယူပြီး ဖုံးကွယ်ပေးထားတဲ့အပြင် ရဲကိုတိုင်ကြားခဲ့ပေမယ့်လည်း တစ်စုံတစ်ရာ အရေးယူဆောင်ရွက်တာမျိုး မရှိခဲ့ဘူးလို့ ရွာခံတွေက ပြောပါတယ်။

MK-014

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)