မဲခေါင်၊ ဇန်နဝါရီ ၂၃

ရှမ်းပြည်နယ် တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်၊ နောင်ထောဝ်ဒေသထဲကို စစ်ကောင်စီက တိုက်ပွဲ ဖြစ်ပွားတာမျိုး မရှိဘဲ လက်နက်ကြီး ပစ်ခတ်နေတယ်လို့ ဒေသခံတွေက ပြောပါတယ်။

မနေ့ည ၈ နာရီလောက်ကတည်းကနေ ဒီနေ့အထိ ဗုံးကြဲ တိုက်ခိုက်တာ၊ လက်နက်ကြီး ပစ်ခတ်တာတွေ ပြုလုပ်နေပြီး စစ်ဘေးရှောင်တွေနဲ့ ဒေသခံတွေဟာ စိုးရိမ်ကြောက်လန့်နေကြတယ်လို့ ဆိုပါတယ်။

ဒေသခံ တစ်ဦးက “ဒီအကြောင်းကို PNO နဲ့ ပေါင်းပြီး ချမ်းသာသွားတဲ့ ဆီဆိုင်၊ ဆိုက်ခေါင်ဘက်က ပအိုဝ်း အိမ်ခြံမြေ သူဌေးတွေ ဆယ်လီတွေ အကုန်သိပါတယ်။ ညတွင်းချင်း သိတာပါ။ သူတို့ ဘာမှ မပြောရဲကြပါဘူး” လို့ ပြောပါတယ်။

လတ်တလော လူနဲ့ နေအိမ်ထိခိုက် ပျက်စီးမှုတွေ မရှိသေးပေမယ့် လက်နက်ကြီး အသံကြောင့် အရပ်သား၊ သက်ကြီးရွယ်အို နာတာရှည် ရောဂါသည်နဲ လူမမာတွေဟာ ထိတ်လန့်နေကြတယ်လို့ သိရပါတယ်။

နောင်ထောဝ်ဒေသဟာ ရှမ်းပြည်နယ်အတွင်း ကရင်နီ စစ်ဘေးရှောင်တွေ အများဆုံး နေထိုင်ကြပြီး ဗုံးကျဲတိုက်ခိုက် ခံရတာကြောင့် နေရပ်မပြန်ရဲသေးဘဲ လုံခြုံတဲ့နေရာမှာ ပုန်းနေကြရတယ်လို့ ဆိုပါတယ်။

၂၀၂၂ ခုနှစ် စက်တင်ဘာလ ၁၂ ရက်နေ့တုန်းက နောင်ထောဝ်ဒေသရှိ စစ်ကောင်စီ တပ်စခန်း ၂ ခုကို ကရင်နီ တော်လှန်ရေး အင်အားစုတွေက ဝင်ရောက် တိုက်ခိုက်ခဲ့ဖူးပြီး စစ်ကောင်စီဘက်က တပ်သား ၂၀ ကျော် သေဆုံးခဲ့ပါတယ်။

CJ-007

#MeKongNews

#နောင်ထောဝ်

#စစ်ကောင်စီ

#လက်နက်ကြီး

#ဗုံးကြဲ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)