မဲခေါင်၊ ဒီဇင်ဘာ ၁၆
ကရင်နီပြည်၊ လွိုင်ကော်မြို့တွင်းမှာ လှည့်လည်သွားလာပြီး မူးယစ်ဆေးရောင်းချနေတဲ့ စစ်ကောင်စီလက်အောက်ခံ ရဲတပ်သားကို ကရင်နီပြည်ရဲတပ်ဖွဲ့ – KSPက ဖမ်းဆီးရမိခဲ့တယ်လို့ ကရင်နီ အမျိုးသားများ ကာကွယ်ရေးတပ် (KNDF) တပ်ရင်း ၅ က ဒီဇင်ဘာ ၁၅မှာ ထုတ်ပြန်ထားပါတယ်။
KNDF နဲ့ KSP ပူးပေါင်းတပ်တွေက ဒီဇင်ဘာ ၁၁ ရက်နေ့မှာ ဖမ်းဆီးနိုင်ခဲ့တာဖြစ်ပြီး အဲဒီရဲတပ်သားဟာ တောင်ဈေးအနီးက ကမ္ဘောဇဘဏ်မှာ လုံခြုံရေး တာဝန်ယူထားသူလို့ ဆိုပါတယ်။
KSP ပြန်ကြားရေးတာဝန်ခံ ရဲမှူးကိုဘိုဘိုက “လောလောဆယ်တော့ မှူး/စိတ် ဥပဒေအရ တရားစွဲဆို သွားမယ်ပေါ့နော်။ ပြီးတော့ နောက်ထပ် စစ်ဆေးချက်တွေ စောင့်ကြည့်ရမှာပေါ့နော်။ ကျနော်တို့တော့ တပ်အပ်ပြောလို့မရသေးဘူး။ မူးယစ်ဆေးနဲ့ ပတ်သက်ရင်တော့ တော်လှန်ရေး ရဲဘော်တွေရော၊ ကျန်တဲ့လူတွေရော အကုန် တန်းတူပါပဲ။ ဥပဒေအထက်မှာ ဘယ်သူမှ မရှိပါဘူး” လို့ ပြောပါတယ်။
ဖမ်းဆီးရမိတဲ့ ရဲတပ်သားဟာ တင်မောင်နိုင် ဖြစ်ပြီး သူ့ဆီကနေ လက်ပစ်ဗုံး ၃ လုံး၊ WY ဆေးပြား ၁၂ ပြား၊ ဖုန်း ၂ လုံးနဲ့ ငွေကျပ် အနည်းကိုလည်း သိမ်းဆည်း ရမိခဲ့တယ်လို့ သိရပါတယ်။
KSP အနေနဲ့ မူးယစ်ဆေးဝါးတိုက်ဖျက်ရေးအတွက် လမ်းဆုံလမ်းခွတွေမှာ လိုက်လံစစ်ဆေးတာ၊ စာသင်ကျောင်းတွေမှာ မူးယစ်ဆေးအန္တရာယ် အသိပေးဟောပြောတာတွေလုပ်ဆောင်နေတယ်လို့ KSP ပြန်ကြားရေးတာဝန်ခံ ကိုဘိုဘိုက ပြောပါတယ်။
နိုဝင်ဘာလ ၉ ရက်နေ့တုန်းကလည်း KSP ထိန်းချုပ်နယ်မြေတွေထဲမှာ KNDF တပ်ရင်း ၅ နဲ့အတူ ပြည်သူတွေကို ရှောင်တခင် စစ်ဆေးတာ၊ ပညာပေးတာတွေ ပြုလုပ်ခဲ့ပြီး သုံးစွဲသူတွေနဲ့ ရောင်းဝယ်ဖောက်ကားသူတွေကို အရေးယူ ဆောင်ရွက်ခဲ့ပါသေးတယ်။
လတ်တလောမှာ ဖမ်းဆီးရမိတဲ့ ရဲတပ်သားကို လုံခြုံရေးကိစ္စကျိုးပေါက်နိုင်တဲ့ ကိစ္စတွေကလွဲပြီး ကုလသမဂ္ဂရဲ့ ချမှတ်ထားတဲ့ အကျဉ်းသားအခွင့်အရေးနဲ့အညီ ထိန်းသိမ်းထားတယ်လို့ သိရပါတယ်။
CJ – 007
#MeKongNews
#KSP
#KNDF
#မူးယစ်ဆေးဝါး
