မဲခေါင်၊ မတ် ၆
ရန်ကုန်-မန္တလေး အမြန်လမ်း၊ ၁၁၅ မိုင် ယာဉ်ရပ်နားစခန်းမှာ မန်းရာဇာ ခရီးသည်တင်ယာဉ်ပေါ် လိုက်ပါလာသူ ကိုယ်ဝန်ဆောင် အမျိုးသမီး ကလေး မိန်းကလေး မွေးဖွားခဲ့တယ်လို့ အမြန်လမ်း ကြက်ခြေနီအဖွဲ့မှ တာဝန်ရှိသူ တစ်ဦးက ပြောပါတယ်။
မတ်လ ၅ ရက်နေ့၊ ည ၁၀ နာရီဝန်းကျင်က ခရီးဆက်ဖို့ လူစုနေစဉ် ကားပေါ် လိုက်ပါလာတဲ့ ကိုယ်ဝန်ဆောင် ဖြစ်သူ ကလေး မွေးဖွားခဲ့တာ ဖြစ်တယ်လို့ ကူညီရာမှာ ပါဝင်သူ တစ်ဦးက ပြောပါတယ်။
“ အမျိုးသမီးက မွေးပြီးတဲ့အချိန် ချက်ကြိုးနဲ့အချင်းက မကျဘူး။ ကျန်တဲ့သူတွေကလည်း မလုပ်တတ်တော့ ကြည့်နေကြတာ။ ပိုင်အိုးနီးယား ဆိုင်ပိုင်ရှင် ကိုဇော်မိုး တို့ ရောက်လာပြီး ကူညီတယ်။ အမြန်လမ်း ကြက်ခြေနီအဖွဲ့လည်း ရောက်လာတယ်။ သားဖွား ဆရာမလည်း ရောက်လာပြီး ချက်ကြိုးဖြတ်ပေးတယ်။ အချင်းကျဖို့လည်း လုပ်ပေးလိုက်တော့ ကလေးအမေလည်း သက်သာသွားပါတယ်” လို့ သူကပြောပါတယ်။
ခရီးသည်တင်ယာဉ်ပေါ် ကလေး မွေးဖွားပြီးနောက် ခရီးဆက်လက်ထွက်ဖို့ အချိန်မရှိတော့တဲ့ အတွက် ခရီးသည်တင်ယာဉ်ပေါ် လိုက်ပါလာသူ အားလုံးကို ပိုင်အိုးနီးယားဆိုင်ပိုင်ရှင် ပိုင်ဆိုင်တဲ့ ဒေါ်မိုး လယ်တောအိမ်မှာ တစ်ညတာ အိပ်ခွင့်ပေးခဲ့တယ်လို့ သိရပါတယ်။
MK-005
