မဲခေါင်၊ မေ ၉

ရှမ်းပြည်နယ်တောင်ပိုင်း၊ တောင်ကြီးမြို့မှာ မြန်မာနှစ်သစ်ကူး သင်္ကြန်ကာလပြီးကတည်းက ကြက်သွန်နီဈေး ၃ ဆနီးပါး ခုန်တက်လာတာကြောင့် စားသုံးသူတွေ အခက်တွေ့နေကြတယ်လို့ အိမ်ရှင်မတွေက ပြောပါတယ်။

တောင်ကြီးမြို့မှာ သင်္ကြန်ကာလမတိုင်ခင်က ကြက်သွန်နီ တစ်ပိဿာဈေးဟာ ၁,၁၀၀ ကျပ်လောက်ပဲ ရှိခဲ့ရာက သင်္ကြန်ကာလအပြီး ၁,၆၀၀ ကျပ်- ၂,၀၀၀ ကျပ်ကနေ တရိပ်ရိပ်မြင့်တက်လာခဲ့ပြီး ဒီနေ့(မေလ ၉)မှာတော့ ၃,၀၀၀ ကျပ်အထိ ဈေးနှုန်းမြင့်တက်လာတာပါ။

အဝေရာပျံကျဈေးမှာ ကြက်သွန်နီရောင်းချနေသူ အသက် ၅၀ အရွယ် အမျိုးသမီးက “နိုင်ငံခြားက ဆွဲနေလို့ ဈေးတက်တာ ပြောတယ်။ ကြောက်ပြီး ဝယ်လှောင်ကြတာလည်း ပါတယ်။ တချို့ပွဲစားတွေက ဈေးပိုခေါ်တာပေါ့။ ပြီးတော့ ကြက်သွန် မပေါ်ခင်ကတည်းက ငွေကြိုချထားပြီး ဈေးဖြတ်ထားတာ။ ကြက်သွန်ပေါ်တာနဲ့ အလုံးသိမ်းပြီး တက်ဈေးနဲ့ ပြန်ရောင်းကြတာပေါ့။ တောင်သူတွေက ထုတ်မရောင်းပဲ ဥထားတာလည်း ရှိတယ်” လို့ ပြောပါတယ်။

သင်္ကြန်ကာလအပြီး ကြက်သွန်နီဈေးတက်ရတဲ့ အကြောင်းအရင်းဟာ အလှူပွဲတွေများလာခြင်း၊ တရုတ်နိုင်ငံက ဝင်လာတဲ့ ကြက်သွန်တွေ အရည်သွေး ညံ့ဖျင်းခြင်း၊ မိုးစိုက်ကြက်သွန်နီအထွက် နောက်ကျနိုင်ခြင်း စတာတွေကြောင့်လည်း ဖြစ်နိုင်တယ်လို့ သူက ဆက်ပြောပြပါတယ်။

ဒါ့အပြင် ရှမ်းပြည်နယ်ကို ကြက်သွန်နီ အဓိကတင်ပို့နေတဲ့ စစ်ကိုင်းတိုင်း၊ မကွေးတိုင်း၊ မန္တလေးတိုင်း စတဲ့ဒေသတွေမှာ တိုက်ပွဲတွေ ဖြစ်ပွားနေတာကြောင့် ကုန်စည်စီးဆင်းမှုတွေ ရပ်တန့်နေတဲ့အပြင် လမ်းတွေပိတ်ထားပြီး စိုက်ပျိုးရေးသုံး ပစ္စည်းတွေ တောင်သူတွေဆီကို အချိန်မီ မရောက်နိုင်တာကြောင့်လည်း ဈေးတက်လာတာလို့ ဆိုပါတယ်။

ကြက်သွန်ဈေး အဆမတန် တက်လာတာကြောင့် စားသုံးသူ အိမ်ရှင်မတွေအပြင် စားသောက်ကုန်ပစ္စည်း ရောင်းချသူတွေကပါ အခက်တွေ့နေပြီး တွက်ခြေမကိုက် ဖြစ်လာတယ်လို့ သိရပါတယ်။

တောင်ကြီးမြို့၊ ကျောက်တစ်လုံး လမ်းမကြီးပေါ်မှာ ထမင်းဆိုင်ဖွင့်ထားသူ အမျိုးသမီး တစ်ဦးက “ဆန်ဈေးကလည်း တစ်သိန်းနားကပ်၊ ကြက်သွန်ဈေးကလည်း တက်လာတော့ ဘယ်လို ဆက်ရောင်းရမလဲ မသိတော့ဘူး။ ပျံကျဆိုင်တွေက ဟင်းတစ်ပွဲ ၂,၀၀၀ ထက် ပိုရောင်းလိုက်ရင် ဘယ်သူမှ ဝယ်မစားကြတော့ဘူး။ ဗမာဟင်းတွေက ကြက်သွန်နီ အဓိက သုံးနေရတော့ ခက်တယ်” လို့ ပြောပါတယ်။

ဒါ့အပြင် ထမင်းဆိုင်တွေအနေနဲ့ တရုတ်ကြက်သွန်နီတွေကို အသုံးပြုမယ် ဆိုပါကလည်း လိုသလောက်မရနိုင်ခြင်းနဲ့ အရသာမရှိခြင်း စတဲ့ အခက်အခဲတွေ ရှိလာနိုင်တယ်လို့ သူက ဆက်ပြောပြပါတယ်။

အခုလို ကြက်သွန်နီဈေးတွေ တက်လာပေမယ့် ဓါတ်မြေဩဇာ ဈေးနှုန်းဟာ ၂ ဆနီးပါး မြင့်တက်လာတာကြောင့် စိုက်ပျိုးသူတွေ အနေနဲ့ တွက်ခြေမကိုက် ဖြစ်နေပြီး စားသုံးသူတွေဘက်ကလည်း ဈေးနှုန်းမြင့်လာတဲ့ဒဏ်ကို ခံစားနေရတယ်လို့ တောင်သူတွေက ပြောပါတယ်။

တောင်ကြီးမြို့ရဲ့ ကြက်သွန်နီ လက်ကားပွဲရုံတွေမှာ ကြက်သွန်နီ တစ်ပိဿာဈေးနှုန်း ရှယ် ၂,၅၀၀၊ လတ်ကြီး, လတ်သန့် ၂,၄၀၀၊ လတ်ချော ၂,၂၀၀ စသဖြင့် အသီးသီးပေါက်ဈေး ရှိနေတယ်လို့ သိရပါတယ်။

ကြက်သွန်နီဈေး တက်ရတဲ့ အကြောင်းအရင်းအနေနဲ့ တောင်ကြီးမြို့က ပွဲရုံပိုင်ရှင်တွေကို ဆက်သွယ်မေးမြန်းရာမှာတော့ ထိုင်းနဲ့ ဘင်္ဂလားဒေ့ရှ်နိုင်တို့က အဓိက ဝယ်ယူနေတာကြောင့်လို့ သိရပြီး ဒီထက်မက ဈေးတက်နိုင်တယ်လို့ ခန့်မှန်း ပြောဆိုထားပါတယ်။

ဒါပေမယ့် ၂၀၁၉ ခုနှစ်ကလို စံချိန်တင် မြင့်တက်လာဖို့ကတော့ ဝယ်လိုအားနဲ့ နိုင်ငံရေး အခြေအနေပေါ် မူတည်နေတယ်လို့ ဆိုပါတယ်။

CJ – 007

#MeKongNews

#ရှမ်းတောင်

#ကြက်သွန်နီ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)