ရှမ်းပြည်နယ် အရှေ့ပိုင်း၊ မိုင်းဆတ်မြို့မရဲစခန်း အနီးမှာ မူးယစ်ဆေးဝါး ရောင်းဝယ်သုံးစွဲသူတွေ သောင်းကျန်း နေပေမယ့် လိုင်းကြေးယူထားတဲ့ အာဏာသိမ်းစစ်တပ်နဲ့ ရဲက ဖမ်းဆီး အရေးယူတာ မရှိဘူးလို့ ဒေသခံတွေက ပြောပါတယ်။
မိုင်းဆတ်မြို့၊ မြို့သစ်ရပ်ကွက်၊ မြို့မရဲစခန်းရဲ့ အနောက်ဘက်မှာ မူးယစ်ဆေးဝါးတွေ ပေါ်ပေါ်ထင်ထင် ရောင်းဝယ်သုံးစွဲနေပြီး ညအချိန်မတော်ထိ သောင်းကျန်းနေပေမယ့် စစ်တပ်နဲ့ ရဲက ဖမ်းဆီး အရေးယူတာ မရှိဘူးလို့ ဆိုပါတယ်။
“ ရဲစခန်းနောက်တည့်တည့်မှာ နေ့ရော၊ ညရော ပေါ်တင်ရောင်းဝယ်တာ၊ သုံးတာတွေ လုပ်နေတာ။ စစ်တပ်နဲ့ ရဲက လိုင်းကြေးယူထားလို့ ထင်တယ်၊ ဘာမှမလုပ်ရဲဘူး။ မနေ့ညကဆို ည ၂ နာရီထိ ဆိုင်ကယ်လီဗာ အကျယ်ကြီး ဖြဲနေကြတယ်။ ဘေးအိမ်တွေကို ဆဲဆို သောင်းကျန်းနေကြတာ” လို့ ဒေသခံတစ်ဦးက ပြောပါတယ်။
မိုင်းဆတ်မြို့က နေရာအနှံ့မှာ မူးယစ်ဆေးဝါး ရောင်းဝယ်သုံးစွဲမှုတွေ ရှိနေပြီး စစ်တပ်နဲ့ ရဲက ဖမ်းဆီးပေမယ့် ငွေကြေးရယူ ပြန်လွှတ်ပေးနေတယ်လို့ သူကဆက်ပြောပါတယ်။
ဒါ့အပြင် မိုင်းဆတ်မြို့မှာ မြို့လည်ခေါင်နဲ့ မြို့ပြင်နေရာ အနှံ့ မူးယစ်ဆေးစွဲသူတွေ၊ အိမ်ယာမဲ့တွေ သွားလာနေတာကို နေ့စဉ် မြင်တွေ့နေရပြီး ခိုးဆိုးလုနှိုက်တွေလည်း ပေါများလာနေတယ်လို့ သိရပါတယ်။
ပြီးခဲ့တဲ့ စက်တင်ဘာလ ၇ ရက်ကလည်း မိုင်းဆတ်မြို့၊ ကွက်သစ်ရပ်ကွက်ရှိ ပြည်သူ့စစ်ခေါင်းဆောင်းရဲ့ နေအိမ်ကို သော့ဖျက်ကာ တီဗွီ၊ စလောင်းဖမ်းစက်၊ မီးစက်၊ အိုးခွက်ပန်းကန်တွေနဲ့ တန်ဖိုးရှိ အသုံးအဆောင်ပစ္စည်း မှန်သမျှ ခိုးယူခံရမှု ဖြစ်ပွားခဲ့ပါတယ်။
