မဲခေါင်၊ မတ် ၁၁

ရှမ်းပြည်နယ် အရှေ့ပိုင်း၊ ကျိုင်းတုံမြို့မှာ တစ်နှစ်တစ်ကြိမ် ကျင်းပခဲ့တာ နှစ်‌ ၉၀ ကျော် ရှိလာပြီ ဖြစ်တဲ့ ဒေသ အထင်ကရ ဈေးပွဲတော်ဖြစ်တဲ့ စော်ဘွား ဈေးပွဲတော်ကို ဒီကနေ့ စတင် ကျင်းပနေတယ်လို့ သိရပါတယ်။

စော်ဘွားဈေးပွဲတော် ခေါ် ဈေး‌ဟောင်းဈေးနေ့ကို ဒီကနေ့ မတ်လ ၁၁ ရက်နေ့မှာ စတင်ကျင်းပနေတာဖြစ်ပြီး လာရောက် လည်ပတ်သူ အများအပြားနဲ့ စည်ကားနေတယ်လို့ ကျိုင်းတုံမြို့ခံ တစ်ဦးက ပြောပါတယ်။

ကျိုင်းတုံ စော်ဘွားဈေး ခေါ် ဈေးဟောင်းနေ့ကို တပေါင်းလဆုတ် “မဂဏန်း” ရက်ကောင်းကို ရွေးချယ် ကျင်းပလေ့ရှိပြီး တစ်ရက်သာ ဖွင့်လှစ် ရောင်းချကာ ကျိုင်းတုံမြို့ပေါ် ပါလျှံတံခါးလမ်းဆုံ တလျှောက် ရှမ်းရိုးရာ အစားအစာများနဲ့ အသုံးအဆောင်တွေ ရောင်းချနေပြီးတော့ စော်ဘွား သင်္ချိုင်းဟောင်းမှာတော့ ရိုးရာ ပူဇော်တာတွေ ပြုလုပ်ကြတယ်လို့ ဆိုပါတယ်။

ဒီဈေးနေ့ဟာ ကျိုင်းတုံမြို့ကို စတင်တည်ထောင်တဲ့ စော်ဘွားကြီး “ စဝ်ကွမ်းကျောက်အင်းထလျန်” လက်ထက် ကတည်းက ပြုလုပ်ခဲ့တဲ့ အထင်ကရနေ့ တစ်ခုဖြစ်ပြီး ၁၉၃၀ ခုနှစ်မှာ မူလဈေးဟောင်း နေရာကနေ လက်ရှိ မြို့မဈေး နေရာကို ပြောင်းရွှေ့ပြုလုပ်ခဲ့ကြတယ်လို့ သိရပါတယ်။

MK-007

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)