မဲခေါင်၊ မေ ၁၉
ရှမ်းပြည်နယ် အရှေ့ပိုင်း၊ တာချီလိတ်မြို့၊ မကာအိုခမ်းရပ်ကွက်မှာရှိတဲ့ WW night club က တီးလုံးသံတွေ ဆူညံလွန်းလို့ ရပ်ကွက်နေ ပြည်သူတွေက ရပ်ကွက်ရုံး သွားတိုင်ပေမဲ့ အရေးမယူဘူးလို့ ဒေသခံ တစ်ဦးက ဒီကနေ့ မေလ ၁၉ ရက်မှာ မဲခေါင်သတင်းဌာနကို ပြောပါတယ်။
WW night club ဟာ ညနေပိုင်း ကတည်းက စတင်ဖွင့်တာဖြစ်ပြီး အသံလုံအောင် မလုပ်ထားလို့ အလပ်အနီး နေထိုင်တဲ့ သက်ကြီးရွယ်အိုတွေ နေထိုင်ရ အဆင်မပြေဘူးလို့ သူကပြောပါတယ်။
“ကျနော်တို့ မကာအိုခမ်း မေဖလားဝါးကွင်းနားက WW night club ပါ။ နေ့ရော ညရော ဆူညံနေတာပဲဗျာ။ ပတ်ဝန်းကျင်လည်း ဂရုမစိုက်တော့ဘူး။ အခု ညနေခင်းကြီးတောင် တဒုန်းဒုန်းနဲ့ ဖွင့်နေတာ။ အသံလည်း လုံအောင်မလုပ်ဘဲ ဖွင့်တော့လည်း အကျယ်လောင်ဆုံး ဖွင့်တယ်။ ခေါင်းရင်းအိမ်က အိမ်မှာဆို အသက် ၈၀ အဘွားရှိတယ်။ ကျနော်တို့ အိမ်မှာဆို ကျနော့် အဒေါ် Covid ထိထားရာကနေ ခုမှ နလန်ထူခါစ။ ဒါကို ရပ်ကွက်ရုံးကို အိမ်နီးနားချင်းတွေစုပြီး သွားတိုင်တော့လည်း အရေးမယူပေးဘူး။ အထက်ကိုသာ စာတင်ပါဆိုပြီး ပြောတယ်” လို့ ရပ်ကွက်အတွင်း နေထိုင်သူ တစ်ဦးက ပြောပါတယ်။
အဆိုပါ နိုက်ကလပ်က အသံတွေကြောင့် အိမ်နီးနားက သက်ကြီးရွယ်အိုတွေ ရင်ဘတ်အောင့်တဲ့ အထိ ဖြစ်နေတယ်လို့ ဒေသခံ တစ်ဦးက ပြောပါတယ်။
တာချီလိတ်က ဘားတွေ၊ နိုက်ကလပ်တွေဟာ အသံလုံအောင် သေချာ ပြုလုပ်ထားလေ့ မရှိတဲ့ အပြင် တချို့ဘားတွေ အပြင်မှာပါ ညလုံးပေါက် အော်ဟစ် သောင်းကျန်းနေလို့ သက်ဆိုင်ရာကို တိုင်ကြားပေမဲ့ အရေးယူတာ မရှိဘူးလို့ မြို့ခံ တစ်ဦးက ပြောပါတယ်။
MK-007
#MeKongNews
#တာချီလိတ်မြို့
#နိုက်ကလပ်
#WW-night-club
