မဲခေါင်၊ မတ် ၂၂
ရှမ်းပြည်နယ် အရှေ့ပိုင်း၊ ကွတ်ခိုင်မြို့နယ်၊ မိုင်းယုလေးနဲ့ နမ့်ဖက်ကာ ကြားက နမ့်မောချောင်းမှာ ရွှေတူးဖော်နေလို့ ချောင်းရေတွေ နောက်ကျိကာ အနီးနားက ကျေးရွာ ၁၀ ရွာ ရေအသုံးပြုလို့ မရ ဖြစ်နေတယ်လို့ ဒေသခံတွေက ပြောပါတယ်။
နမ့်မောချောင်းနားမှာ ရွှေတူးဖော်ရေး လုပ်ငန်းတွေ ပြီးခဲ့တဲ့ ၂၀၂၁ ခုနှစ်ကတည်းက လုပ်နေကြတာဖြစ်ပြီး တစ်ဖွဲ့ပြီး တစ်ဖွဲ့ လာရောက် လုပ်ကိုင်နေကြတယ်လို့ သိရပါတယ်။
ချောင်းဘေးမှာ စက်တွေနဲ့ တူးပြီး ချောင်းရေထဲမှာ ရွှေကျင်လို့ ရေတွေနောက်ပြီး အနီးအနားက နမ့်မောချောင်းရေ အားထား အသုံးပြုနေရတဲ့ ကျေးရွာတွေ အတွက် အဆင်မပြေ ဖြစ်လာတယ်လို့ ဆိုပါတယ်။
လက်ရှိ နွေရာသီ ရေပိုလိုအပ်တဲ့ အချိန် တစ်ပတ်မှာ တစ်ရက်သာ နားပြီး ရွှေတူးဖော်နေတာကြောင့် ရေတွေနောက်ကာ သုံးမရတော့ဘူးလို့ ဒေသခံ တစ်ဦးက ပြောပါတယ်။
ဒီလို ရွှေတူးဖော်မှုတွေကြောင့် နမ့်မောချောင်းကို အားထားနေရတဲ့ လင်လိုင်၊ ဟိုခို၊ ဟိုခိုကွက်သစ်၊ ဟိုခို Camp၊ မိူင်းယူ၊ မိူင်းယုကွက်သစ်၊ ပန်လော၊ မန်တုံ ကုန်စုံ၊ မန်ဟောင် ကုန်စုံ၊ ဟိုနား Camp စတဲ့ ကျေးရွာတွေက ပြည်သူတွေ ရေခက်ခဲနေတယ်လို့ သိရပါတယ်။
အခုလို ရွှေတူးဖော်နေတာကို တိုင်းရင်းသား တော်လှန်ရေး တပ်ဖွဲ့တွေဖြစ်တဲ့ တအာင်း အမျိုးသား လွတ်မြောက်ရေး တပ်မတော်-TNLA နဲ့ ကချင် လွတ်မြောက်ရေး တပ်မတော် KIA တို့က ခွင့်ပြုပေးထားတယ်လို့ ဒေသခံတွေက ဆိုပါတယ်။
အလားတူ အင်းလေးဒေသမှာလည်း ရွှေတူးဖော်နေတာကြာင့် နုန်းတွေထကာ အနည်ထိုင် သောင်ထွန်းနေပြီး အင်းလေးကန် ကောလာမှာကို ဒေသခံတွေ စိုးရိမ်နေကြပါတယ်။
REF:ရွှေဖီမြေ
MK-007
