တိုက်ပွဲအတွင်းဖမ်းဆီးရမိသည့် RCSS တပ်သား ၁၁ဦးကို ပြန်လွှတ်ပေးရန် SSPP တပ်ဖွဲ့က ဆုံးဖြတ်ထားပြီး ၎င်းတို့ကို လမ်းစရိတ်ပါထောက်ပံ့ရန် စီစဉ်ထားကြောင်း SSPP က ပြောသည်။
ထောက်ပံ့ပေးမည့် ပမာဏကို ထုတ်ဖော်မပြောသော်လည်း ဖမ်းဆီးရမိသူများကို ပြန်လွှတ်ပေးတိုင်း လမ်းစရိတ် ထောက်ပံ့ပေးလေ့ရှိကြောင်း SSPP မှ ပြောခွင့်ပုဂ္ဂိုလ် ဗိုလ်မှူးစိုင်းဖုန်းဟန်က မဲခေါင်ကိုပြောသည်။
“လောလောဆယ်တော့ သူတို့လည်းမပြန်ရသေးဘူး။ ပြန်ရင်တော့ ခရီးစရိတ်ထောက်ပံ့ပေးမှာပါ။ အရင်ကလည်း ပြန်တဲ့သူတွေကို တယောက် ၅သိန်း၊ ၆သိန်းထောက်ပံ့ပါတယ်” ဟု ၎င်းကပြောသည်။
SSPP တပ်ဖွဲ့မှ ပြန်လွှတ်ပေးမည့် RSCC တပ်သား တစ်ဦးလျှင် ခရီးစရိတ်အဖြစ် ကျပ် ၃သိန်း ထောက်ပံ့ပေးရန် စီစဉ်ထားသည်ဟု အခြားသတင်းရင်းမြစ်တစ်ဦး မဲခေါင်သတင်းဌာနကိုပြောသည်။
“ပြန်လွှတ်ပေးမယ့်သူတွေကို သူတို့ဆွေမျိုး၊ မိဘတွေကို လက်မှတ်ထိုးပြီး လာခေါ်ခိုင်းထားတယ်။ လမ်းမှာ တစ်ခုခုဖြစ်မှာဆိုးလို့” ဟု အဆိုပါ သတင်းရင်းမြစ်က ပြောသည်။
ရှမ်းပြည်နယ်အတွင်း ဖြစ်ပွားသည့် တိုက်ပွဲများအတွင်း RCSS တပ်သား ၁၃ဦးကို SSPP က ဖမ်းဆီးရမိပြီး တစ်ဦးမှာ တိုက်ပွဲတွင်းရရှိသည့် ဒဏ်ရာကြောင့် လမ်းတွင် သေဆုံးသွားပြီး နောက်ထပ်တစ်ဦးမှာ SSPP ဌာနချုပ်တွင် ဆေးကုသပေးနေစဉ် သေဆုံးသွားကြောင်း SSPP က ပြောသည်။
ဖမ်းဆီးခံရသည့် RCSS တပ်ဖွဲ့ဝင် ၁၃ဦးမှာ ကျောက်မဲမှ ၁၁ဦးနှင့် မိုင်းကိုင်မှ ၂ဦးဖြစ်ကြောင်း သိရသည်။
