မဲခေါင်၊ ဇူလိူင် ၂၇

နှစ်သောင်းတန် ငွေစက္ကူအသစ်ထုတ်ဝေမယ်လို့ စစ်ကောင်စီကြေညာအပြီးမှာ အိမ်သုံးဆေးဝါး ကုမ္ပဏီတချို့ အရောင်းပိတ်လိုက်တာကြောင့် လက်ကျန်ဆေးဝါးများ ဈေးနှုန်းမြင့်တက်မှုရှိနေတယ်လို့ ဈေးကွက်အတွင်းစုံစမ်းသိရှိရပါတယ်။

ဒေါ်လာငွေလဲနှုန်းများမြင့်တက်မှုကြောင့် ဆေးကုမ္ပဏီတွေက ဈေးကွက်လိုအပ်ချက်အတိုင်း ပစ္စည်းရောင်းချပေးခြင်းမရှိတဲ့အတွက် ဆေးဝါးဈေးနှုန်းများ မြင့်တက်လျက်ရှိနေတဲ့အပြင် အခုထပ်မံပြီး ငွေစက္ကူထုတ်မယ့်ကြေညာချက်ကြောင့် အရောင်းပိတ်လိုက်တဲ့အတွက် ဈေးနှုန်းများမြင့်တက်နေရတယ်လို့ မင်္ဂလာဈေးရှိ ဆေးဝါးလက်ကားဒိုင်တွေဆီက သိရပါတယ်။

“နှစ်သောင်းတန်ထွက်မယ်လို့သတင်း ထွက်လိုက်ကတည်းက ပစ္စည်းလုံးဝ မချပေးတော့ဘူး၊ လက်ကျန်ဘဲရောင်းရတော့ ကိုယ်ပြန်ဝယ်ရင် ဘယ်ဈေးနှုန်းတွေနဲ့ဝယ်ရမလည်းမသိတော့ ဈေးကတက်ရောင်းနေရတယ်။ အောက်လမ်းဆေးကလည်း တအားအဖမ်းဆီးတွေများနေတော့ မဝင်ဘူး၊ ဝယ်ယူသူတွေဈေးမြင့်တက်ပြီးသောက်နေရတာပေါ့” လို့ အမည်မဖော်လိုသူ ဆေးဝါးလက်ကားရောင်းချသူ တစ်ဦးကပြောပါတယ်။

နာတာရှည်သောက်ဆေးဝါးနဲ့ ၊ ချောင်းဆိုး၊နှာဆေး၊ အဖျားပျောက်ဆေးများမှာ ထုတ်လုပ်တဲ့နိုင်ငံအလိုက် ၅၀၀ ကျပ်မှ သောင်းကဏန်းအထိ ဈေးနှုန်းများမြင့်တက်မှုရှိတယ်လို့ သိရပါတယ်။

အိမ်သုံးဆေးဝါးတွေဖြစ်တဲ့ ဒီကိုဂျင်မှာပြီးခဲ့တဲ့လကုန်ပိုင်းထိ ၁၀ ကဒ်ပါတစ်ဘူးကို ၁၄၅၀၀ ကျော်သာရှိပြီး အခု၂၀၀၀၀ ဖြစ်ပြီး ဒီကိုဂျင် ကဒ် ၅၀ ပါတစ်ဘူးကိုအရင်က ၃၈၀၀၀ ကျပ်ဖြစ်ပြီး ၊ လက်ရှိမှာ တော့ ၆၀၀၀၀ အထိဈေးမြင့်တက်လာတယ်လို့ သိရပါတယ်။

“ထိုင်းဘက်ကဝင်တဲ့ ဆေးတွေကလည်း အဖမ်းအဆီးကများ ဂိတ်စစ်ဆေးတာတွေများနေတယ်၊ မဝင်ဘူး ကုမ္မဏီအားလုံးရဲ့ ၃ ချိူး ၂ ချိူး အရောင်းပိတ်လိုက်တော့ တော်တော်လေးအခက်ခဲဖြစ်တယ် ဝယ်သူကလည်း အရင်လို ဂယက်နည်းနည်းထရင် အရမ်းဝယ်တာမျိူးမရှိဘူး” လို့ ဗိုလ်ချူပ်ဈေးသစ်ရှိ ဆေးဝါးလက်ကားရောင်းချတဲ့ သူတစ်ဦးကပြောပါတယ်။

“ဆေးဈေးတွေကတက်နေတယ်၊ နှလုံးသွေတိုးဆီးချိူရှိနေတော့ဆေးကမသောက်လို့မရဘူး ဒါပေမယ့် ကုန်ဈေးနှုန်းကတက် စားဝတ်နေရေးတောင်ကြပ်တည်းနေတာ၊ရောဂါရဲ့ ပုံမှန်သောက်ရမယ့်အတိုင်းမသောက်နိုင်တော့ဘူး ၊ တစ်ရက်ခြားတစ်ခါသောက်နေကတယ်၊ ပြည်သူတွေမျက်နှာ ကိုကြည့်ပါလို့ဘဲပြောချင်တယ်” လို့ သုဝဏ္ဏမြို့နယ်အတွင်းနေထိုင်သူ အမည်လွဲ မစန်းစန်းမြင့်ကပြောပါတယ်။

လူသုံးဆေးဝါးရောင်းချရန် ကုမ္ပဏီအသစ်များ လျှောက်ထားမှုကို စစ်ကောင်စီဘက်မှ လက်မခံဘဲ ၅ နှစ်စောင့်ဆိုင်းရန် ပြန်လည်ပြောဆိုထားကြောင်းနဲ့ ပြည်ပမှ တင်ပို့မှုကို ရပ်ဆိုင်းထားတာတွေကြောင့် လူသုံးဆေးဝါးနဲ့ နိုင်ငံခြားတင်ပို့ကုန်ပစ္စည်းများဈေးမြင့်တက်မှုရှိနေတယ်လို့ သိရပါတယ်။

MK-006

#MeKongNews

#ဆေးဝါး

#စစ်ကောင်စီ

#နှစ်သောင်းတန်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)