တရုတ်ဘက်မှ ဆီမရသည့်အတွက် ပန်ဆန်းတွင် ဓာတ်ဆီစျေးတက်
မဲခေါင်၊ မတ် ၄
UWSA ထိန်းချုပ်ဒေသဖြစ်သည့် ပန်းဆန်း(ပန်ခမ်း)မြို့တွင် တရုတ်နိုင်ငံဘက်မှ ဓာတ်ဆီတင်သွင်းခွင့် မရသည့်အတွက် ဈေးတက်နေကြောင်း ဒေသခံနှင့် ခရီးသွားများထံက သိရသည်။
ပန်ဆန်းမြို့နှင့် ထိစပ်နေသည့် နယ်စပ်ဂိတ်ပေါက်မှ တဆင့် ဓာတ်ဆီနှင့် ကုန်ပစ္စည်းအချို့ တင်သွင်းခွင့်ကို ဆက်လက်ကန့်သတ်ထားခြင်းကြောင့် ယခုကဲ့သို့ ဆီစျေးများ မြင့်တက်နေရခြင်းဟု ဒေသခံများနှင့် ပန်ဆန်းကို ဖြတ်ကာ ပြေးဆွဲနေသည့် ယာဥ်မောင်းများထံမှ သိရသည်။
“ပန်ဆန်းမှာ လမ်းဘေးဆီဆိုရင် တစ်လီတာ ယွမ်၂၅၊ ၃၀အထိတောင်ရှိတယ်။ အရင်တစ်လခန့်ကတည်းက ၁၃ယွမ်ရှိတယ်။ နေရာတိုင်းလည်းမရဘူး။ ဆီဆိုင်ကပြောတာတော့ တရုတ်ဘက်က ဓာတ်ဆီမရတာ တစ်ပတ်လောက်ရှိပြီပြောတယ်။ မိုင်းလားနဲ့ လားရှိုးဘက်တော့ ဆီမရှားဘူး ရနေတယ်။ တရုတ်ဆီပဲ” ဟု မိုင်းလား။ လားရှိူး၊ မူဆယ် ပြေးဆွဲနေသည့် ယာဥ်မောင်း တစ်ဦးက မဲခေါင်ကို မတ်လ၄ရက်တွင် ပြောသည်။
ကားသမားများအနေဖြင့် ပန်ဆန်းတွင် ဆီမထည့်ဘဲ မိုင်းလားမှ ဓာတ်ဆီ တစ်လီတာ ၈ယွမ်ခွဲဈေးဖြင့် ပုံးဖြင့်ဝယ်ယူလာကာ သုံးစွဲနေကြောင်း၊ တန့်ယန်းတွင် တစ်လီတာ ၆၀၀၀ကျပ်၊ ချင်းရွှေဟော်တွင် တစ်လီတာကို ၁၀ယွမ်နှင့် မူဆယ်တွင် ကျပ်၆၀၀၀ ရှိကြောင်း ယာဉ်မောင်းများထံမှ သိရသည်။
ပြီးခဲ့သည့် ရက်ပိုင်းက ၎င်းပန်ဆန်းသို့ဖြတ်သန်းစဥ် ဓာတ်ဆီဆိုင်များတွင် ကားများ၊ ဆိုင်ကယ်များ တန်းစီဝယ်နေကြသည်ကို တွေ့ရပြီး ဆီလိုသလောက်မရဘဲ ၃၀လစ်(လီတာ) သာ ရကြောင်း ဒေသခံများထံက သိရသည်ဟု ဆိုသည်။
အခြား ဝ ထိန်းချုပ်ဒေသများဖြစ်သည့် ပန်လုံ၊နမ့်တစ်၊ ဟိုပန်တို့တွင်လည်း ဆီဝယ်ယူရရှိမှု အလားတူ ခက်ခဲနေကြောင်း သိရသည်။
ဒေသအခြေစိုက် WNL သတင်းတွင်လည်း တရုတ်ဘက်မှ ဆီမရသဖြင့် ပန်ဆန်းတွင် ဆီစျေးများမြင့်တက်နေသည်မှာတစ်ပတ်ခန့်ရှိပြီဖြစ်သည်ဟုဖော်ပြပါရှိသည်။
“ဝ” ပြည်သွေးစည်း ညီညွတ်ရေး တပ်မတော် – UWSA ဦးစီးချုပ်ရုံးမှ ဇန်နဝါရီ ၂၀ ရက်နေ့ ရက်စွဲဖြင့် “ဝ”ပြည်နယ်ဘက် မှကိုးကန့်ဒေသဘက်သို့ လွတ်လပ်စွာ ကုန်စည်ဖြတ်သန်းခွင့် ပြန်လည်ခွင့်ပြုထားခြင်းဖြစ်သည်။
ယင်းမတိုင်မီ တရုတ်ဘက်မှ “ဝ” နယ်စပ်ဂိတ်၊ နမ့်တစ်(မန်ခါး)၊ မုန်းအား၊ ဆောဖားနဲ့ ပန်ဆန်း(ပန်ခမ်း)ဂိတ်များကို ပြီးခဲ့တဲ့နှစ် သြဂုတ်လကတည်းကပင် ကုန်ပစ္စည်း အဝင်အထွက်တင်းကြပ်ထားခဲ့ခြင်းဖြစ်သည်။
မဟာ
#MeKongNews
#ပန်ဆန်း
#UWSA
#စက်သုံးဆီ
#တရုတ်
