ဒေသတွင်း၌ ကုန်စည်အသစ်ဟု ဆိုနိုင်သည့် လက်ပံပွင့် အူတိုင်အခြောက်များ အောင်ပန်း၌ ဈေးကောင်းရနေ

မဲခေါင်၊ ဖေဖော်ဝါရီ ၂၈

ရှမ်းပြည်တောင်ပိုင်း၊ အောင်ပန်း ကုန်စည်ဒိုင်၌ ယခုနှစ်၊ ယခုလတွင်သာ စတင်ဝယ်ယူသဖြင့် ကုန်စည်အသစ်ဟု ဆိုနိုင်သော လက်ပံပွင့်အူတိုင်ခြောက်များ လက်ရှိတွင် ဈေးကောင်းရနေသည်။

လက်ရှိတွင် အူတိုင်လှပါက တစ်ပိဿာလျှင် ကျပ် ၆၀၀၀ နှင့် အူတိုင်ညံ့လျှင် တစ်ပိဿာ ကျပ် ၅၀၀၀ ခန့်ပေါက်ဈေးရှိကာ ကုန်စည်ဒိုင်မှ တစ်လအတွင်း ကုန်ချိန် ၂၀၀၀ ကျော်ရောင်းချခဲ့ပြီးဖြစ်ကြောင်းနှင့် တာချီလိတ်နှင့် ရွှေတြိဂဒေသကို တင်ပို့ရောင်းချသည်။

ရှမ်းပြည်တောင်ပိုင်းထွက် လက်ပံပွင့်များသည် အညာဒေသထွက် လက်ပံပွင့်များထက် အပွင့်သေးသော်လည်း အူတိုင်ပိုလှသဖြင့် ဈေးကောင်းရနေသည်ဟု ကုန်စည်ဒိုင်ကပြောသည်။

“ ဆေးဖက်ရော စားသုံးတာရော လုပ်တယ်၊ ပို့သလောက်ယူတယ်၊ ဒီမှာလည်း အမှိုက်ထဲကရွှေပေါ့၊ ဟင်းချက်စားတာအပြင်၊ အလကား အပင်အောက်မှာပစ်ထားတာထက် အပိုဝင်ငွေရတာပေါ့” ဟုကုန်စည်ဒိုင်ကပြောသည်။

ယခင်က ရောင်းချခြင်းမရှိခဲ့သည့် လက်ပန်ပွင့်အူတိုင်ဈေးကွက်သည် ယခုတစ်လအတွင်းတွင်သာ အမှာရှိလာခြင်းဖြစ်သဖြင့် ဟဲဟိုး၊ ကလော၊ အင်းခေါင်းဘက်မှ လာရောက်ရောင်းချသူများပြားလာကြောင်းသိရသည်။

ရှမ်းပြည်တောင်ပိုင်း၌ လက်ပံပင်များကို ကလော၊ ဟဲဟိုး၊ အောင်ပန်း၊ ပင်းတယ၊ ရွာငံ၊ အင်းလေးဒေသ၊ပအိုဝ်းဒေသ၊ ဖယ်ခုံမြို့နယ်၊ ပေါင်းလောင်းမြို့နယ်တွေမှာ အများဆုံး တွေ့မြင်ရသည်။

လက်ပံပွင့်သည် ဆီးချို၊ သွေးတိုး၊ မီးယပ်ရောဂါများအတွက် မြန်မာ့ဆေးတစ်လက်ဖြစ်သလို ရင်သားကင်ဆာ၊ လေးဖက်နာရောဂါများအတွက် လည်း ဆေးတစ်ဖုံဖြစ်ကြောင်း ယောအတွင်းဝန် ဦးဖိုးလှိုင်၏ ဥတုဘောဇနသင်္ဂဟကျမ်း၌ ပြဆိုထားသည်။

မဟာ
#MekongNews

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)