ရှမ်းအရှေ့တွင် စက်သုံးဆီဈေး တရိပ်ရိပ်တက်လာ
မဲခေါင်၊ ဖေဖော်ဝါရီ ၂၁
ထိုင်းနိုင်ငံဘက်မှ စက်သုံးဆီတင်ပို့ရောင်းချမှု ပိတ်ပင်ပြီး သီတင်းပတ် နှစ်ပတ်ကျော်အကြာတွင် ရှမ်းပြည်အရှေ့ပိုင်းရှိ တာချီလိတ်၊ ကျိုင်းတုံ၊ မိုင်းဆတ်၊ မိုင်းတုံ ခရိုင်များအတွင်း စက်သုံးဆီဈေးနှုန်း တရိပ်ရိပ်တက်လာကြောင်း ဒေသခံများထံကသိရသည်။
ယနေ့ ဖေဖော်ဝါရီ ၂၁ရက်၊ တာချီလိတ်မြို့တွင် အောက်တိန်း ဓာတ်ဆီ ၁ လီတာလျင် ထိုင်းဘတ်ငွေ ၃၆ ဘတ်၊ 95 အောက်တိန်း ဓာတ်ဆီ ၁ လီတာလျင် ၃၇ ဘတ်၊ HSD ဒီဇယ် ၁ လီတာလျှင် ၃၃ဘတ်ခွဲ၊ ပရီမီယမ် ဒီဇယ် ၁ လီတာလျှင် ၃၇ဘတ်ခွဲဖြင့် ရောင်းချနေပြီး ယခင် ထိုင်းနိုင်ငံဘက်မှ တင်သွင်းစဉ်က တစ်လီတာ ဘတ် ၃၀ ခန့်သာရှိကြောင်း တာချီလိတ်ဒေသခံတစ်ဦးက ပြောသည်။
မိုင်းဆတ်၊ မိုင်းတုံမြို့များ ဘက်တွင်မူ ဆီပန့်ဆိုင်အများအပြား ပိတ်ထားနေရပြီး အချို့ရောင်းချသည့် ဆိုင်များတွင်မူ ယနေ့ဖေဖော်ဝါရီ၂၁ရက်တွင် ဓာတ်ဆီတစ်လီတာ ၆၅၀၀ ကျပ်၊ ဒီဇယ်တစ်လီတာ၆၀၀၀ ကျပ်အထိ စျေးမြင့်တက်လျက်ရှိသည်။
“မိုင်းဆတ်ရော မိုင်းတုံရောက ထိုင်းဘက်ကယူခဲ့တာ၊ အခု တာချီလိတ်လို ရန်ကုန်ဆိပ်ကမ်းဘက်က ရယူဖို့ ကြိုးစားနေပါတယ်။ ပြည်နယ်ကထောက်ခံမှ ဝယ်လို့ သယ်လို့ရတာ” ဟု မိုင်းဆတ် ဆီလုပ်ငန်းရှင်တစ်ဦးက ပြောသည်။
မိုင်းတုံ၊ မိုင်းဆက်မြို့များတွင် ထိုင်းဘက်မှ ဆီမဖြတ်မီက ဓာတ်ဆီနှင့်ဒီ ဇယ်တစ်လီတာ ၄၀၀၀ ကျပ်ဝန်းကျင်သာရှိရာမှ ဆီဖြတ်ပြီး ၁၆ ရက် အကြာတွင် ဈေးနှုန်းများ မြင့်တက်နေခြင်းဖြစ်ကြောင်း ဒေသခံများက ပြောသည်။
ကျိုင်းတုံမြို့နယ်အတွင်း၌မူ စက်သုံးဆီ တစ်လီတာကို ကျပ် ၅၃၀၀ ခန့်ဈေးရှိနေပြီး ထိုင်းဘက်က ဆီတင်ပို့မှု မပိတ်ပင်မီက ကျပ် ၄၂၀၀ ဝန်းကျင်သာရှိကြောင်း သိရသည်။
လက်ရှိယနေ့ ရန်ကုန်တွင် 92 အောက်တိန်း ဓာတ်ဆီ ၁ လီတာလျင် ၃၁၂၅ကျပ်၊ 95 အောက်တိန်း ဓာတ်ဆီ ၁ လီတာလျင် ၃၂၇၅ကျပ်၊ HSD ဒီဇယ် ၁ လီတာလျှင် ၂၇၆၅ကျပ်နှင့် ပရီမီယမ် ဒီဇယ် ၁ လီတာလျင် ၃၄၇၅ ကျပ်တို့ရှိနေကြောင်းသိရပြီး ယမန်နေ့ကထက် စျေးနှုန်းများ အနည်းငယ် မြင့်တက်လာသည်။
တာချီလိတ်မြို့နယ်အတွင်း တရားဝင်စက်သုံးဆီဆိုင် ၂၃၊ မိုင်းဆက်မြို့နယ်အတွင်း ၁၆ ဆိုင်နှင့် မိုင်းတုံမြို့နယ်အတွင် ၁၁ ဆိုင်ရှိပြီး ထိုင်းနိုင်ငံဘက်မှ တင်သွင်းသည့်စက်သုံးဆီကို အဓိက မှီခိုနေရခြင်းဖြစ်သည်။
ကျားဖြန့်လုပ်ငန်းများ နှိမ်နင်းရေးအကြောင်းပြချက်ဖြင့် ထိုင်းနိုင်ငံဘက်မှ စက်သုံးဆီနှင့် လျှပ်စစ်မီး တင်ပို့ရောင်းချမှုကို ဖေဖော်ဝါရီလ ၅ရက်က စတင်ကာ ပိတ်ပင်ခဲ့ခြင်းဖြစ်ပြီး ယင်းနောက် လျှပ်စစ်မီးပြတ်တောက်မှုနှင့် စက်သုံးဆီဈေးကြီးမြင့်မှုဒဏ်ကို ဒေသခံများ ခံစားနေရခြင်းဖြစ်သည်။
မဟာ
#MeKongNews
