မဲခေါင်၊ ဖေဖော်ဝါရီ ၁၆

ရှမ်းပြည်နယ်ရဲ့ထွက်ကုန်ထဲမှာ အဓိက ထွက်ကုန်ဖြစ်တဲ့ ကြက်သွန်ဖြူဟာ တရုတ်ကအဝင်နည်းတဲ့အတွက် စျေးကောင်းရနေတယ်လို့ အောင်ပန်းကုန်စည်စျေးကွက်ကသိရပါတယ်။

လက်ရှိမှာ ဥတလုံးဖြူကြီးကောင်းအဆင့်ကို တစ်ပိဿာ ကျပ် ၁သောင်း ၈ ထောင်ကနေ ၂ သောင်းခွဲအထိစျေးရှိနေတယ်လို့ သိရပါတယ်။ ကြူကုတ်ကတော့ ၁သောင်း ကျော်ပဲစျေးပေါက်ပါတယ်။

ထိုင်းနိုင်ငံကကြိုက်တဲ့ ခရမ်းစွဲကတော့ ထိုင်းကမစွဲသေးလို့ စျေးမမြင့်သေးသလို အထွက်လဲ စျေးကွက်မဝင်သေးဘူးလို့ သိရပါတယ်။

ဂျင်းတက်စျေးကွက်မှာ မြေနီဂျင်းကစျေးပိုရပြီး မြေဖြူမြေနီမြေဝါဂျင်းက ရာသီအရ အထားမခံလို့ စျေးနိမ့်တယ်လို့ သိရပါတယ်။

မြေနီဂျင်း တစ်ပိဿာ ၄ ထောင်အထိ ရှိနေပြီး အရောက ၁ ထောင်ကျော်ပဲရှိတယ်လို့သိရပါတယ်။

ဂျင်းမ ခေါ် အပင်ထွက် ဥဖော် ရောင်းတာကတော့ စျေးမရှိပါဘူး၊ ဂျင်းမှာ ကြယ်ဂျင်း ခေါ်အတက်များပြီး မြေနီမှာစိုက်တဲ့ဂျင်းက အထားခံလို့ စျေးအမြင့်ဆုံးမှာ ရှိတယ်လို့ ဂျင်းစျေးကွက်က သိရပါတယ်။

ဂျင်းကို သင်္ကြန်အကျော်လောက်မှာစိုက်ပြီး ၂လအကြာ အပင်ထွက်ချိန်မှာ ဂျင်းမကိုဖော်ရောင်းကြပြီး အရည်အသွေးပြည့်ထွက်တဲ့ နတ်တော်လလောက်မှာ အတက်တွေကို စျေးကွက်တင်ကြတာလို့သိရပါတယ်။

ဂျင်းကို ရှမ်းပြည်နယ်တောင်ပိုင်း၊ ဟဲဟိုးလွင်ပြင်၊ အောက်ပန်းတစ်ဝိုက်၊ ကလောအစပ်နဲ့ရွာငံ၊ ပင်းတယဘက်တွေမှာ အဓိကစိုက်ပြီး ပင်လောင်းဘက်လည်း ပုံမှန်စိုက်ကြတယ်လို့ သိရပါတယ်။

ဂျင်းကို အရင်နှစ်တွေက အိန္ဒိယဘက်က အဓိက စွဲပေမယ့် ဒီနှစ်တော့ ပြည်ပဝယ်လက်နည်းပေမယ့် ပြည်တွင်းမှာ ရောင်းအားရှိနေတာဖြစ်လို့ စျေးမှန်ရနေတာလို့ သိရပါတယ်။

MK-012

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)