လက်ရှိ ဆန်အသစ်တွေ ပေါ်လာပြီး အမျိုးအစားအလိုက် ၂၄ ပြည်ပါ ဆန်တစ်အိတ်ကို ၂၀၀၀ ကျပ်ကနေ ၅၀၀၀ ကျပ်ကြား ဈေးကျဆင်းလာပြီး ဆက်လက် ကျဆင်းဖွယ်ရှိတာကြောင့် အရောင်းအဝယ် အေးနေတယ်လို့ သိရပါတယ်။
အခုက ဆန်အသစ် ပေါ်ချိန် ဆိုတော့ ပွဲရုံတွေက ဈေးချတော့ ဆန်ဈေးကျတယ် ဆိုပြီး ဖြစ်နေတာ၊ ဆန်ပြတ်လပ်မယ် ဆိုပြီး သတင်းတွေ ထွက်ထားတော့ အရင် ဝယ်ထားတာတွေ မကုန်သေးဘူး။ တက်ဈေးနဲ့ မိထားတဲ့ ဟာတွေက အခု ဈေးကျနေတော့ ပြန်ချရောင်းတော့ ရှုံးတာပေါ့။ ဈေးအတက်အကျကို ချိန်ညှိ ရောင်းနေရတာပေါ့
လို့ တောင်ကြီးမြို့က ဆန်ကုန်သည် တစ်ဦးက ပြောပါတယ်။
ရှမ်းပြည်နယ်မှာ စပါးစိုက် ဧက အများအပြား ရှိပေမယ့် ရှမ်းဆန်ကိုသာ အဓိက စိုက်ပျိူးတာကြောင့် ဧရာဝတီတိုင်းနဲ့ စစ်ကိုင်းတိုင်းတွေက ထွက်တဲ့ ဆန်ကို အဓိက အားထားနေရပြီး ယခု ရှမ်းဆန် အသစ် ပေါ်ပြီ ဖြစ်ကာ ရှမ်းဆန်ဟောင်း တစ်အိတ်ကို ကျပ် ၈၀၀၀၀ ကျော် ပေါက်ဈေးရှိကြောင်း သိရပါတယ်။
လက်ရှိ ရှမ်းပြည်နယ် တောင်ပိုင်း ဆန်ဈေးကွက်မှာ စားသုံးမှု အများဆုံး ဖြစ်တဲ့ ဧည့်မထ တစ်အိတ် ၄၅၀၀၀ ကျပ်ဝန်းကျင်၊ ဖျာပုံပေါ်ဆန်း ရှယ်တစ်အိတ် ၆၆၀၀၀ ကျပ်ဝန်းကျင်၊ ရွှေဘိုပေါ်ဆန်း တစ်အိတ် ၉၀၀၀၀ ကျပ် ဝန်းကျင် ပေါက်ဈေး ရှိနေတယ်လို့ သိရပါတယ်။
ယခုရက်ပိုင်း အတွင်း ရန်ကုန်မြို့မှာရှိတဲ့ ဘုရင့်နောင် ကုန်စည်ဒိုင်ကို ဆန်နဲ့ ဆန်ကွဲ ဝင်ရောက်မှု ၂ ဆခန့် မြင့်တက်နေလို့ ဆန်ဈေး အနည်းငယ် ကျဆင်းနေတယ်လို့ သိရပါတယ်။
မြန်မာ့ဆန် ပြည်ပ ဝယ်လိုအား ရှိပေမယ့် ငွေလဲနှုန်း မငြိမ်သက်မှုကြောင့် ပြည်ပ တင်ပို့ရာမှာ အခက်အခဲများစွာ ရှိနေပြီး လက်ရှိ ပွင့်လင်းရာသီ စပါးသစ် ပေါ်ချိန်မှာ ဖြစ်ပေါ်လာမယ့် ငွေလဲနှုန်းကို စောင့်ကြည့်နေတယ်လို့ ဆန်ကုန်သည်တွေထံက သိရပါတယ်။
