မဲခေါင်၊ မတ် ၁၀
အာဏာသိမ်းစစ်ခေါင်းဆောင် မင်းအောင်လှိုင်ဟာ စီးပွားရေးလုပ်ငန်းရှင်တွေနဲ့ တွေ့တိုင်း လုပ်ငန်းနဲ့သက်ဆိုင်တဲ့ ချေးငွေတွေထုတ်ပေးမယ်လို့ မက်လုပ်ပေးနေပေမယ့် တကယ်တန်းမှာ ချေးငွေရရှိဖို့ခက်ခဲနေတယ်လို့ လုပ်ငန်းရှင်အသိုင်းအဝိုင်းကနေ သိရပါတယ်။
ပြီးခဲ့တဲ့နှစ်၊ နှစ်လယ်ပိုင်းက ငွေကျပ် ၁၀ ဘီလီယံကို အသေးစားနဲ့ အလတ်စားစီးပွားရေးလုပ်ငန်းတွေ – SMEs လုပ်ငန်းတွေအပါအဝင် လယ်ယာထွက်ကုန်လုပ်ငန်း၊ စိုက်ပျိုးမွေးမြူရေးလုပ်ငန်းတွေ ဖွံဖြိုးတိုးတက်ရေးအတွက် ထုတ်ချေးပေးမယ်လို့ စစ်ခေါင်းဆောင် ကပြောဆိုခဲ့ပေမယ် ၆လနီးပါး ကြာမြင့်သည်တိုင်အောင် ချေးငွေထုတ်ချေးဖို့ ဘာအသံမှ မကြားရဘူးလို့ SMEs လုပ်ငန်းရှင်တစ်ဦးက ပြောပါတယ်။
စစ်ကောင်စီလက်ထက် အခြားကဏ္ဍတွေအပေါ် ချေးငွေထုတ်ပေးရာမှာလည်း မြေပြင်မှာ အမှန်တကယ် လုပ်ကိုင်နေတဲ့ လုပ်ငန်းရှင်တွေကို သေချာစိစစ်ပြီး ထုတ်ချေးပေးတာမျိုး မဟုတ်ဘဲ စစ်အုပ်စုနဲ့ ပဏာသင့်သူတွေကိုသာ ဦးစားပေး ထုတ်ပေးနေတယ်လို့ သိရပါတယ်။
စားသုံးဆီ ပြည်ပတင်သွင်းမှု လျော့ကျဖို့ ချေးငွေထုတ်ပေးမယ်လို့ အာဏာသိမ်းစစ်ခေါင်းဆောင်က ပြီးခဲ့တဲ့ ဇန်နဝါရီလကပြောခဲ့ပေမယ့် ၂လကျော်တဲ့အထိ ဘယ်လိုလျှောက်ထားရမှန်းမသိတဲ့ လုပ်ငန်းရှင်တွေအများကြီးရှိတယ်လို့ စားသုံးဆီလုပ်ငန်းရှင်တစ်ဦးကလည်း ပြောပါတယ်။
စီးပွားရေးလုပ်ဖို့ အခြေအနေကောင်းတွေမဖန်တီးပေးဘဲ ချေးငွေထုတ်ပေးယုံနဲ့ အကြွေးပိုလာတာရှိပြီး စီးပွားရေးလည်ပတ်မှုအားမကောင်းလာနိုင်ဘူးလို့ သူက ဆက်ပြောပါတယ်။
ချေးငွေချေးရာမှာ လုပ်ငန်းနဲ့သက်ဆိုင်တဲ့ စာရွက်စာတန်းတွေ၊ လုပ်ငန်းလိုင်စင်နဲ့ အခွန်ပေးဆောင်ရတာတွေ ရှိတဲ့အပြင် ချေးငွေရရှိမှုကလည်း အပေါင်ပစ္စည်းအကြီးအသေးပေါ်မှုတည်ပြီး ကွာခြားမှုရှိတာကြောင့် လုပ်ငန်းတစ်ခုတစ်ကယ်လုပ်ဖို့ မလုံလောက်တာများတယ်လို့ စီးပွားရေးလုပ်ငန်းရှင်တွေက ပြောပါတယ်။
လက်ရှိမှာ SMEs လုပ်ငန်းတွေ ရပ်တည်ဖို့ခက်ခဲနေပြီး ငွေကြေးဖောင်းပွတာ၊ လျှပ်စစ်မီးလုံလောက်စွာ မရတာ၊ စက်သုံးဆီဈေးမြင့်တက်နေတာ၊ အလုပ်သမားရှားပါးတာတွေအပြင် သွင်းကုန်၊ ထုတ်ကုန် တင်းကျပ်မှုတွေကြောင့် ကုန်ကြမ်းအခက်အဲတွေလည်း ရှိနေတယ်လို့ လုပ်ငန်းရှင်တွေထံကနေ သိရပါတယ်။
ဒီလိုချေးငွေတွေလိုက်ပေးနေတာဟာ စစ်ကောင်စီအတွက် မဲဆွယ်သလိုပုံစံသာ ဖြစ်နေတယ်လို့ လုပ်ငန်းရှင်တွေက ဝေဖန်ပါကြပါတယ်။
အခုလည်း စစ်ကောင်စီက မသန်စွမ်းစီးပွားရေးလုပ်ငန်းရှင်တွေထံ ချေးငွေသက်တမ်း ၃နှစ်ရှိတဲ့ ကာလတိုချေးငွေ ထုတ်ချေးပေးမှာဖြစ်ပြီး လျှောက်ထားလိုသူတွေ အနေနဲ့ မတ်လ ၂၄ ရက်နေ့ နောက်ဆုံးထားပေးပို့ရမယ်လို့ အသေးစားငွေရေးကြေးရေး အဖွဲ့အစည်းများသို့ ပြန်လည်ထူထောင်ရေး ဦးစီးဌာနကထုတ်ပြန်ကြေညာထားပြန်ပါတယ်။
MK -006
#MeKongNews
#ချေးငွေ
#SMEs
#မသန်စွမ်း
