အာဏာသိမ်း စစ်ခေါင်းဆောင်က သီးနှံစိုက်ပျိုးမှု အထွက်နှုန်းကောင်းကာ ပြည်ပတင်ပို့မှု အားကောင်း လာတယ်လို့ ပြောဆိုမှုဟာ မြေပြင်အခြေနေကို မျက်ကွယ်ပြုပြီး ထင်ရာမြင်ရာ ပြောဆိုမှုသာ ဖြစ်တယ်လို့ ပို့ကုန်သွင်းကုန် လုပ်ငန်းရှင်တွေက ဝေဖန်ပါတယ်။
မနေ့က နေပြည်တော်မှာ ပြုလုပ်ခဲ့တဲ့ စစ်ကောင်စီ အစည်းဝေးမှာ တိုင်းပြည်သာယာဝပြောပြီး ဆန်နဲ့ပဲ အပါအဝင် အခြားသီးနှံများ အထွက်နှုန်းကောင်းကာ ပြည်ပ တင်ပို့မှု အားကောင်းလာတဲ့ အတွက် ဒီထက်ပို လုပ်နိုင်အောင် ကြိုးစားရမယ်လို့ စစ်ခေါင်းဆောင် မင်းအောင်လှိုင်က ပြောပါတယ်။
ဒီလို ပြောဆိုမှုနဲ့ ပတ်သက်ပြီး “ မူဝါဒကို အမျိုးမျိုးပြောင်းလဲတယ်။ အခွန်အခ ဈေးတွေတက်တာတွေနဲ့ လုပ်ငန်းရှင်တွေ အခက်အခဲ ဖြစ်နေတာပါ။ အထွက်နှုန်းကောင်းလို့ ပြည်ပ တင်ပို့နိုင်တာ မဟုတ်ပါဘူး။ ကုန်သည်က ကုန်ကို ဆက်လှောင်ထားလို့ မရတော့လို့ အရင်နှစ်ကဟာတွေ ထုတ်ရောင်းရတာပါ။ သူက မြေပြင် အခြေနေကို မျက်ကွယ်ပြုပြီး ဟန်ပြ ပြောနေတာ။ ဒေါ်လာ ဂယက်ကြောင့် တစ်ဖက်နိုင်ငံနဲ့ ကတိကဝတ် ပျက်မှာစိုးလို့ အရှုံးခံ ပို့နေရတဲ့ အခြေနေပါ” လို့ ပို့ကုန် လုပ်ငန်းရှင်တစ်ဦးက ပြောပါတယ်။
လက်ရှိ စိုက်ပျိုးသီးနှံ အဓိက ထွက်ရှိတဲ့ တိုင်းနဲ့ ပြည်နယ် ဒေသတွေမှာ စစ်ကောင်စီရဲ့ ထိုးစစ်ကြောင့် တိုက်ပွဲများ ဖြစ်နေပြီး တောင်သူများ လယ်ယာစွန့်ခွာ ထွက်ပြေး တိမ်းရှောင်နေရကာ နေအိမ်များကိုပါ စစ်ကောင်စီတပ်များက မီးရှို့ဖျက်ဆီး နေပါတယ်။
ဒါ့အပြင် တောင်သူတွေ အနေနဲ့ စိုက်ပျိုးဖို့ မျိုးစေ့လုံလောက်မှု မရှိခြင်း၊ ဓာတ်မြေသြဇာ ဈေးအဆမတန်တက်ခြင်း၊ စိုက်ပျိုးမြေ သိမ်းယူခံရမှုများ ရှိနေခြင်း တို့ကြောင့် လာမယ့်နှစ် သီးနှံ ထွက်ရှိမှု ကျဆင်းကာ ပြည်ပတင်ပို့နိုင်မှု လျော့ကျနိုင်တယ်လို့ သိရပါတယ်။
စစ်ကောင်စီ အစည်းအဝေးတွေမှာ မြေပြင် အခြေအနေနဲ့ ကင်းကွာတဲ့ လက်တန်း စီမံကိန်းတွေကို ချပြ အကောင်အထည်ဖော်ဖို့ တွန်းအားပေးလေ့ရှိတဲ့ မင်းအောင်လှိုင်ဟာ နိုင်ငံတော်က ထုတ်ချေးပေးထားတဲ့ ငွေတွေ တာဝန်သိစိတ်နဲ့ ပြန်လည်ပေးဆပ်ဖို့ ပြည်သူတွေကို ခြမ်းခြောက် ပြောဆိုခဲ့ပါသေးတယ်။
