မဲခေါင်၊ နိုဝင်ဘာ ၆
စစ်ကိုင်းတိုင်း၊ ကောလင်းမြို့ပေါ်က စစ်ကောင်စီ တပ်စွဲထားတဲ့ မြို့မရဲစခန်းကို တော်လှန်ရေး ပူးပေါင်း တပ်ဖွဲ့တွေက မနေ့ နိုဝင်ဘာ ၅ ရက် ညနေပိုင်းမှာ တိုက်ခိုက်သိမ်းယူနိုင်ခဲ့ပြီး နိုင်ငံရေး အကျဉ်းသားတွေကို ခေါ်ထုတ်နိုင်ခဲ့တယ်လို့ ဒေသခံတွေထံက သိရပါတယ်။
မနေ့က ညနေ ၅ နာရီဝန်းကျင်မှာ KIA၊ AA နဲ့ ဒေသခံ PDF ပူးပေါင်းတပ်ဖွဲ့တွေဟာ စစ်ကောင်စီတပ်စွဲထားတဲ့ မြို့မရဲစခန်းကို သိမ်းယူနိုင်ခဲ့ပြီး ညပိုင်းမှာတော့ စစ်တပ်က အလံဖြူထောင် လက်နက်ချလို့ ထွေအုပ်ရုံးကို သိမ်းပိုက်နိုင်ခဲ့တယ်လို့ ဒေသတွင်း သတင်းရင်းမြစ်တွေထံက သိရပါတယ်။
“ညနေ ၆ နာရီမှာ ရဲစခန်းရတယ်။ ည ၁ နာရီကျတော့ ထွေအုပ်ကိုရတာ” လို့ သတင်းရင်းမြစ်က ပြောပါတယ်။
ကောလင်းမြို့ကို တော်လှန်ရေးတပ်ဖွဲ့တွေ သိမ်းပိုက်ချိန်မှာ စစ်တပ်နဲ့ မိသားစုဝင်တွေ အလံဖြူထောင်ပြီး လက်နက်ချ ထွက်ပြေးလို့ မိသားစု၀င်တွေကိုတော့ လွှတ်ပေးလိုက်တယ်လို့ သူကဆိုပါတယ်။
“အင်တာနက်လိုင်း မရဘူးဗျ။ ဖုန်းတောင် တီဗီအင်တန်နာတိုင် ထောင်ပြီး ဆက်ရတာ” လို့ သတင်းရင်းမြစ်က မဲခေါင်သတင်းဌာနကို ပြောပါတယ်။
ပြီးခဲ့တဲ့ နိုဝင်ဘာ ၃ ရက်နေ့ မနက် ၁ နာရီ နောက်ပိုင်းစပြီး ကောလင်း PDF နဲ့ တော်လှန်ရေးရဲဘော်တွေ ပူးပေါင်းကာ ကောလင်းမြို့သိမ်း တိုက်ပွဲကို စတင်ခဲ့ရာ ဒီစစ်ဆင်ရေးဟာ ရှမ်းမြောက်ပိုင်းက ၁၀၂၇ စစ်ဆင်ရေးနဲ့ ဆက်စပ်နေတယ်လို့ သတင်းရင်းမြစ်တွေက ဆိုပါတယ်။
လက်ရှိအချိန်မှာ မြို့ပေါ်ရပ်ကွက်တွေထဲက ပိတ်မိနေတဲ့ ဒေသခံပြည်သူတွေကို နေရာရွှေ့ပြောင်းထားရပြီး တော်လှန်ရေးတပ်ဖွဲ့တွေက မြို့ကို ထိန်းချုပ်ထားတာကြောင့် အများစုက နေအိမ်တွေနဲ့ ဘုန်းကြီးကျောင်းတွေမှာ ဆက်လက် နေထိုင်နေကြတယ်လို့လည်း သိရပါတယ်။
ကောလင်းမြို့ပေါ်က တိုက်ပွဲ အတွင်း စစ်ကောင်စီဘက်က အများအပြား သေဆုံးပြီး လက်နက် အများအပြား သိမ်းဆည်းနိုင်ခဲ့တယ်လို့ သိရပေမယ့် အတိအကျကိုတော့ မဲခေါင်သတင်းဌာနက ဆက်လက် စုံစမ်းဆဲ ဖြစ်ပါတယ်။
တိုက်ပွဲဖြစ်ပွားနေတဲ့ ရက်တွေအတွင်း ကောလင်းမြို့ကို လျှပ်စစ်မီး ဖြတ်တောက်ထားပြီး ဖုန်းလိုင်း၊ အင်တာနက်လိုင်းနဲ့ အခြား ဆက်သွယ်နိုင်တဲ့ အရာတွေကို ဖြတ်တောက်ထားတယ်လို့လည်း KR အဖွဲ့က ဆိုထားပါတယ်။
နိုဝင်ဘာ ၃ ရက်နေ့ကစပြီး စစ်ကောင်စီဘက်က စစ်ရဟတ်ယာဉ်တွေနဲ့ ကောလင်းမြို့ပေါ် လူနေရပ်ကွက်တွေကို အကြိမ်ကြိမ် ဗုံးကြဲ တိုက်ခိုက်ခဲ့ပြီး နိုဝင်ဘာ ၄ ရက်တစ်နေ့တည်းမှာ ၇ ကြိမ်ထိ ဗုံးကြဲ ခဲ့ပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် ဒေသခံပြည်သူ ၅ ဦးထက်မနည်း သေဆုံးခဲ့ပြီး ထိခိုက်ဒဏ်ရာရသူတွေနဲ့ အိမ်မီးလောင်မှုတွေရှိခဲ့ရာ မြို့တွင်း အခြေအနေ အသေးစိတ်ကိုတော့ မေးမြန်းနေဆဲ ဖြစ်ပါတယ်။
MK-009
#MekongNews
#ကောလင်းမြို့
#တော်လှန်ရေးတပ်
#ရဲစခန်း
