ဖယ်ခုံ – မိုးဗြဲ လမ်းတစ်လျှောက် တိုက်ပွဲများ ဆက်တိုက်ဖြစ်ပွားနေ
မဲခေါင်၊ နိုဝင်ဘာ ၁၈
ရှမ်းပြည်တောင်ပိုင်း၊ ကရင်နီပြည်အစပ်၊ ဖယ်ခုံမြို့နယ်၊ ဖယ်ခုံ – မိုးဗြဲလမ်း တစ်လျှောက်မှာ မနေ့ (နိုဝင်ဘာ ၁၈) နေ့လည်ပိုင်းကစပြီး တိုက်ပွဲပြင်းထန်နေတယ်လို့ ဒေသခံတွေက ပြောပါတယ်။
ဖယ်ခုံ – ပင်လောင်းလမ်း တစ်လျှောက်မှာ ဖြစ်ပွားခဲ့တဲ့ တိုက်ပွဲတွေအတွင်း ကရင်နီတော်လှန်ရေး အင်အားစုတွေဖက်က မိုးဗြဲအထိ ပြန်ဆုတ်ပေးလိုက်ရတာကြောင့် လတ်တလောမှာ စစ်ကောင်စီဘက်က အသာစီးရနေတဲ့သဘောရှိပါတယ်။
“ပင်လောင်းမှာလည်း ဖြစ်နေသေးတယ်၊ တချို့ကျန်သေးတယ်၊ ဒီအပတ်ထဲ စစ်တပ်ဖက်က စစ်ကူပို့တာ တော်တော်များတယ်၊ မနေ့ကလည်း မိုးဗြဲမှာ မှားကြဲမိတယ်လို့ကြားတယ်” လို့ မိုးဗြဲမြို့ခံ ကိုငယ်ဆိုသူက ပြောပါတယ်။
ဖယ်ခုံမှာ ရောက်ရှိနေတဲ့ စစ်ကောင်စီတပ်က အင်အား ၃၀၀ ဝန်းကျင်နဲ့ မိုးဗြဲကို စစ်ကြောင်းထိုးနေပြီး အဲဒီကနေတဆင့် နန်းမယ်ခုံ၊ လွိုင်ကော်ဘက်ကို ဆက်လက် စစ်ကြောင်းထိုးဖို့ စီစဉ်နေတယ်လို့ ဆိုပါတယ်။
စစ်ကောင်စီတပ်က ဖယ်ခုံ – မိုးဗြဲ – လွိုင်ကော်လမ်းအတိုင်း အင်အားဖြည့်ထားသလို နောက်ထပ် လွိုင်ကော် – ဘော်လခဲ – ဖားဆောင်းလမ်းအတိုင်းကိုလည်း စစ်ကူဖို့ စီစဉ်နေတယ်လို့ မြေပြင်အရင်းအမြစ်တွေက သုံးသပ်ပါတယ်။
“မိုးဗြဲမှာ စကစတွေ နေရာယူထားပြီ၊ အသက် ၇၀ အဖိုးအရွယ်လည်း တစ်ယောက်ဖမ်းထားတယ်၊ ကျနော်တို့လည်း အစကတည်းက ရှောင်ခိုင်းတယ်၊ ပွဲကနေတုန်းဆိုတော့ လုပ်ရကိုင်ရခက်တဲ့အခြေအနေ ဖြစ်နေတယ်” လို့ မြေပြင်သတင်းအရင်းအမြစ် ကိုစိုးဆိုသူက ပြောပါတယ်။
တိုက်ပွဲများကြောင့် ဖယ်ခုံ၊ မိုးဗြဲဘက်က တိမ်းရှောင်လာသူတွေကို ပင်လောင်းမြို့နယ်၊ နမ့်ဖာမူကျးရွာမှာ စစ်ကောင်စီတပ်က ပိတ်ဆို့နေပြီး လက်ရှိ နန်းထာရွာမှာ ခိုလှုံနေရတယ်လို့ သိရပါတယ်။
ပင်လောင်း – ဖယ်ခုံလမ်း တစ်လျှောက်ကိုလည်း စစ်ကောင်စီတပ်တွေက အလုံးစုံ ထိန်းချုပ်လိုက်ပေမယ့် တော်လှန်ရေးအင်အားစုတွေဖက်က လတ်တလောတိုက်ပွဲမပြီးဆုံးတာကြောင့် သွားလာတာတွေ မပြုလုပ်ကြသေးဖို့ မေတ္တာရပ်ခံထားပါတယ်။
မိုးဗြဲမြို့ လွယ်ယင်းမင်္ဂလာရပ်ကွက်ကို နိုဝင်ဘာ ၁၅ ရက်ညက လေကြောင်းတိုက်ခိုက်ခဲ့ရာမှာ နေအိမ် သုံးလုံး ထိခိုက်ပျက်စီးခဲ့ပြီး ပြည်သူနှစ်ဦးထိခိုက်မှု ရှိတယ်လို့ ရပ်ကွက်တွင်း နေထိုင်သူတွေက ပြောပါတယ်။
အလားတူ မနေ့ (နိုဝင်ဘာ၁၇)က နေ့လည်ပိုင်းမှာလည်း ကရင်နီပြည် ဖားဆောင်းမြို့မှာ တိုက်ပွဲပြင်းထန်ခဲ့ပြီး စစ်ကောင်စီက လေကြောင်း တိုက်ခိုက်ခဲ့ပေမယ့် ဖုန်းလိုင်းများ ပြတ်တောက်နေမှုကြောင့် ထိခိုက်ပျက်စီးမှု အခြေအနေကို မသိရသေးပါ။
ဓါတ်ပုံ။ Facebook၊ လပြည့်ညက ဗိုးဗြဲကို ဗုံးကြဲခဲ့တဲ့ပုံဟောင်း၊
MK-14
#MeKongNews
