မဲခေါင်၊ မတ် ၂၈
ကချင်ပြည်နယ်၊ တရုတ် – မြန်မာ နယ်စပ် ကုန်သွယ်ရာ ဗန်းမော် – လွယ်ဂျယ်လမ်းဘက်က စစ်ကောင်စီ တပ်စခန်း တချို့ကို မတ်လ ၂၇ ရက်နေ့က KIA နဲ့ ပူးပေါင်းတပ်ဖွဲ့က သိမ်းပိုက်လိုက်ကြောင်း KIA ရှေ့တန်း နဲ့ နီးစပ်သူတွေဆီက သိရပါတယ်။
“ဗန်းမော် နဲ့ လွယ်ဂျယ်ကြားက စိန်လုံလမ်း တကြော မှာရှိတဲ့ လော့်ဒန် အူဒါန်ဘွမ်၊ လော့်မွန်ရွာ ကာကင်း၊ ရှန်တိုင် ကာကင်း၊ ဘန်ယောက်ဝ် ကာကင်းတွေကို သိမ်းလိုက်တယ်” လို့ KIA ရှေ့တန်းနဲ့ နီးစပ်သူ တစ်ဦးက ပြောပါတယ်။
အဲဒီထဲက လော့်မွန်ရွာ ကာကင်းကို မနက် ၁၁ နာရီ ခွဲခန့်က၊ လော့်ဒန် အူဒါန်ဘွမ် ကာကင်းကို နေ့လည် ၁၂ နာရီခန့်က၊ ဘန်ယောက်ဝ် ကာကင်းကို နေ့လည် ၁၂ နာရီခွဲခန့်က နဲ့ ရှန်တိုင်ဘွမ်ကာင်းကို မွန်းလွဲ ၂ နာရီခွဲခန့်က စသဖြင့် သိမ်းနိုင်ခဲ့တယ်လို့ သူက ပြောပါတယ်။
ဗန်းမော် – မိုးမောက် – စိန်လုံ – လွယ်ဂျယ် ကုန်သွယ်ရေး လမ်းကြောင်း တလျှောက်ရှိတဲ့ စစ်ကောင်စီ စခန်း ၇ နေရာကို ယမန်နေ့ မတ်လ ၁၇ ရက်နေ့ မနက် ၇ နာရီခန့်ကစ KIA နဲ့ ပူးပေါင်းအဖွဲ့တွေ တပြိုင်တည်း ထိုးစစ်ဆင်တိုက်ခိုက်ခဲ့တာဖြစ်တယ်လို့ နောက်ထပ် KIA ရှေ့တန်းနဲ့ နီးစပ်သူ တစ်ဦးက ပြောပါတယ်။
“သိမ်းထားတဲ့ စစ်ကောင်စီစခန်းတွေဘက် စစ်ကောင်စီတွေ လေကြောင်နဲ့ ဗုံးကြဲနေတယ်။ ဒီ မိုးမောက်နဲ့ လွယ်ဂျယ်ကြားမှာတော့ စစ်ကောင်စီ တပ်စခန်း ၃ နေရာ လောက်ပဲ ကျန်တော့တယ်။ စစ်ကောင်စီဘက်ကလည်း တာပိန်ဘက် အင်အားတွေ ရာချီတက်လာနေတယ် ကြားတယ်” လို့ သူက ပြောပါတယ်။
အခုလ မတ်လ ၇ ရက်နေ့ကစ KIA နဲ့ ပူးပေါင်းတော်လှန် ရေးတပ်ဖွဲ့တွေဟာ လိုင်ဇာအနီး ဝန်းကျင်က စစ်ကောင်စီ တပ်စခန်းတွေနဲ့ ဗန်းမော် – မြစ်ကြီးနား လမ်း တလျှောက်က စစ်ကောင်စီ စခန်းတွေကို တပြိုင်ထဲ ထိုးစစ်ဆင်တိုက်ခိုက်ခဲ့ပြီး စစ်ကောင်စီ တပ်စခန်း အကြီး အသေး ၄၀ နီးပါး သိမ်းဆည်း ရှိခဲ့ပြီးနောက် ယမန်နေ့ မတ်လ ၂၇ ရက်နေ့မှာတော့ ဗန်းမော် – လွယ်ဂျယ်လမ်းတလျှောက်က စစ်ကောင်စီစခန်းတွေကို စတင်ထိုးစစ်ဆင် တိုက်ခိုက်နေတာဖြစ်ပါတယ်။
ဒါ့အပြင် မြစ်ကြီးနား – ဖားကန့် လမ်းနဲ့ မြစ်ကြီးနား – ပူတာအို လမ်းဘက်လည်း နှစ်ဖက် စစ်ရေးတင်းမာနေဆဲ ဖြစ်ပါတယ်။
CJ-008
