မဲခေါင်၊ မတ် ၁၅
ကရင်နီပြည်နယ်အခြေစိုက်၊ လွိုင်ကော်ဒေသခံပြည်သူကာကွယ်ရေးတပ် Loikaw Local PDF -Alpha 2 က မတ်လ ၁၂ ရက်ကစပြီး ရဲဘော်သစ်တွေခေါ်ယူနေပြီး ၃ ရက်အတွင်းမှာ လျှောက်ထားသူ ၂၅ ဦးကျော်ပြီလို့ တပ်ဖွဲ့တာဝန်ရှိသူတဦးကပြောပါတယ်။
“မအလ စစ်မှုထမ်းဥပဒေထုတ်ပြီးနောက် လူငယ်တွေဆက်သွယ်လာတာ များလာတယ်။ မအလ လက်ထဲပါမသွားအောင် တော်လှန်ရေးကိုစိတ်ဝင်စားတဲ့ လူငယ်တွေအတွက် လမ်းဖွင့်ရင်း တော်လှန်ရေးအရှိန်လည်း ပိုအားကောင်းစေဖို့ ခေါ်ယူဖြစ်တာပါ”လို့ သူက ပြောပါတယ်။
ရဲဘော်တာဝန်ထမ်းဆောင်ချင်တဲ့သူတွေအနေနဲ့ အသက် ၁၈ နှစ်ကနေ ၄၀ အတွင်းရှိ ကျန်းမာရေးကောင်းမွန်သူ၊ ပင်ပန်းဆင်းရဲမှုဒဏ်ခံနိုင်သူ၊ လက်နက်ကိုင်တော်လှန်ရေးနဲ့ စစ်အာဏာရှင်အမြစ်ပြတ်ချေမှုန်းရေးမှာ စိတ်အားထက်သန်မှုရှိသူ၊ တပ်ဖွဲ့မှာ တနှစ် တာဝန်ထမ်းဆောင်နိုင်သူ၊ တပ်ဖွဲ့က ချမှတ်ထားတဲ့ စည်းမျဥ်းဥပဒေတွေနဲ့ မူဝါဒတွေကို လိုက်နာဆောင်ရွက်နိုင်သူဖြစ်ရမယ်လို့ သိရပါတယ်။
ဆက်သွယ်လာတဲ့ ရဲဘော်သစ်တွေရဲ့ စားဝတ်နေရေး၊ နယ်မြေလုံခြုံရေး၊ စစ်ကောင်စီတပ်နဲ့ ပတ်သတ် ဆက်နွယ်မှုမရှိစေရေး၊ လမ်းကြောင်းအနေအထားတွေအပေါ်မူတည်ပြီး စိစစ်ရွေးချယ်ရတာတွေရှိတယ်လို့ ဆိုပါတယ်။
“အပြင်မှာရှိတဲ့လူငယ်တွေ တော်လှန်ရေးကို စိတ်ဝင်စားပါ၊ ဝင်ရောက်ပူးပေါင်းပါ၊ စိတ်ချရတဲ့ တော်လှန်ရေးအဖွဲ့တွေဆီ ချိတ်ဆက်ဆောင်ရွက်ပါလို့လဲ နှိုးဆော်ပါတယ်ဗျ”
Loikaw Local PDF -Alpha 2 တပ်ဖွဲ့က ခေါ်ယူမယ့် ရဲဘော်အရေအတွက် ကျား/မ အတိအကျနဲ့ နောက်ဆုံးခေါ်ယူမယ့်ရက်စွဲတွေ ကန့်သတ်ထားတာမရှိသေးဘဲ စိစစ်ရွေးချယ်ခေါ်ယူသွားမယ်လို့ဆိုပါတယ်။
CJ-004
