မဲခေါင်၊ နိုဝင်ဘာ ၂၉

မကွေးတိုင်း၊ ဂန့်ဂေါမြို့နယ်၊ ကန်ရွာ နယ်မြေရဲစခန်းကို စွန့်ခွာ ထွက်ပြေးရာမှာ စစ်ကြောင်းနဲ့အတူ မလိုက်နိုင်လို့ စွန့်ပစ်ခံရတဲ့ ရဲဒုတပ်ကြပ် တစ်ဦးကို ကာကွယ်ရေးတပ်-PDF တွေ ဖမ်းဆီး ထိန်းသိမ်းထားတယ်လို့ ဂန့်ဂေါ ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

မနေ့က နိုဝင်ဘာ ၂၇ ရက်၊ မနက် ၅ နာရီမှာ ကန်ရွာစခန်းကို ရောက်နေတဲ့ ခလရ (၃၀) စစ်ကြောင်းနဲ့အတူ ကန်ရွာစခန်းက လက်ကျန် စစ်ကောင်စီအဖွဲ့တွေ အားလုံး စခန်းကို စွန့်ခွာ ထွက်ပြေးသွားတာလို့ သိရပါတယ်။

စခန်းကို စွန့်ခွာထွက်ပြေးစဉ် မြစ်သာမြစ် အနောက်ဘက်ကမ်း ရေတိမ်တဲ့ နေရာက ခြေလျင် ဖြတ်ကူးစဥ် ဖျားနာပြီး စစ်ကြောင်းနောက် မလိုက်နိုင်တဲ့ ရဲဒုတပ်ကြပ် သန်းဇော် ကို စစ်တပ်က တွဲမခေါ်ဘဲ သေနတ်ကို သိမ်းပြီး စွန့်ပစ်ထားခဲ့တာကြောင့် ကာကွယ်ရေးတပ်ဖွဲ့တွေ ဖမ်းဆီးထိန်းသိမ်း ခဲ့ရတယ်လို့ ဂန့်ဂေါ ပအဖ က ပြောပါတယ်။

ကန်ရွာရဲစခန်းကို ဂန့်ဂေါခရိုင်တပ်ရင်းတွေနဲ့ ဒေသခံ ပြည်သူ့ကာကွယ်ရေးတပ်တွေ ၇ လကျော်ကြာ ဝိုင်းဝန်း ပိတ်ဆို့ပြီး ဒရုန်းနဲ့ အကြိမ်ကြိမ် ဗုံးချကာ၊ လက်နက်ကြီး၊ လက်နက်ငယ်တွေနဲ့ ပစ်ခတ် တိုက်ခိုက်ခဲ့တယ်လို့ သိရပါတယ်။

ရဲစခန်းကို ပိတ်ဆို့ထားစဉ် တိုက်ပွဲ ဖြစ်တာမရှိဘဲ နိုဝင်ဘာ ၄ ရက်နဲ့ ၂၁ ရက်နေ့တွေမှာ ကန်ရွာထဲကို စစ်ကောင်စီ ဂျက်ဖိုက်တာနဲ့ ဗုံးကြဲ တိုက်ခိုက် ခဲ့တယ်လို့ ဂန့်ဂေါ ပအဖ က ဆိုပါတယ်။

ပြီးခဲ့ နိုဝင်ဘာ ၂၅ ရက်နေ့က အင်အား ၁၀၀ ဝန်းကျင်ပါ စစ်ကောင်စီ စစ်ကြောင်းဟာ ကျောက်ဂူတောရက ရဟန်း ၂ ပါးနဲ့ အမျိုးသမီး ၁၃ ဦးကို လူသားဒိုင်းလုပ်ပြီး မြစ်သာမြစ်ကူး တံတား အတိုင်း ကန်ရွာအတွင်း ဝင်ရောက်ခဲ့တာကြောင့် ရဟန်းနဲ့ ပြည်သူတွေ ထိခိုက်မှာ စိုးရိမ်လို့ ထောင်ထားတဲ့ မိုင်းတွေ ဖောက်ခွဲကာ ကန်ရွာရဲစခန်းကို ပိတ်ဆို့ထားတဲ့ ကာကွယ်ရေးတပ်တွေ နောက်ဆုတ်ခဲ့ရတယ်လို့ သိရပါတယ်။

လက်ရှိ ကန်ရွာက ဆုတ်ခွာသွားတဲ့ စစ်ကြောင်းဟာ ကျောက်ဂူတောရမှာ ရောက်ရှိနေပြီး ကန်ရွာရဲစခန်းကိုတော့ ဂန့်ဂေါခရိုင် တပ်ရင်းတွေနဲ့ ပကဖ အဖွဲ့ဝင်တွေ ဝင်ရောက် ရှင်းလင်းနေတယ်လို့ ဂန့်ဂေါ ပအဖရဲ့ ထုတ်ပြန်ချက်မှာ ဖော်ပြထားပါတယ်။

MK-009

#MeKongNews

#ဂန့်ဂေါမြို့နယ်

#ကန်ရွာရဲစခန်း

#ဒုတပ်ကြပ်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)