မဲခေါင်၊ နို၀င်ဘာ ၁၆
ရှမ်းပြည်နယ် မြောက်ပိုင်းမှာ ညီနောင်မဟာမိတ် ၃ ဖွဲ့နဲ့ ပူးပေါင်းတပ်ဖွဲ့တွေရဲ့ ၁၀၂၇ စစ်ဆင်ရေး ရက် ၂၀ မြောက်မှာ စစ်ကောင်စီတပ်စခန်း ၄ ခုကို ထပ်မံ သိမ်းပိုက် နိုင်ခဲ့တယ်လို့ ညီနောင် ၃ ဖွဲ့ပြန်ကြားရေးက မနေ့က ထုတ်ပြန်လိုက်ပါတယ်။
မနေ့က နိုဝင်ဘာ ၁၅ ရက်မှာ ကိုးကန့် ကိုယ်ပိုင်အုပ်ချုပ်ခွင့်ရဒေသ၊ မော်ထိုက်မြို့က “တလင်ကဲရှမ်းဗျူဟာကုန်း”၊ “မော်ထိုက်စိုင်းကျောက်ရှမ်”၊ “မော်ထိုက် တလင်ကဲတောင်” နဲ့ ရှင်းဖျင်ကိုင်၊ လျှံဖုန်ရွှေ အနီးက စစ်ကောင်စီ တပ်စခန်းတွေကို ထပ်မံ သိမ်းပိုက်နိုင်ခဲ့တယ်လို့ ဆိုပါတယ်။
စခန်းသိမ်း တိုက်ပွဲတွေ အတွင်း စစ်ကောင်စီတပ်သား ထိခိုက် သေဆုံးမှု များပြားပြီး အတွဲလိုက် ဒုံးတွေအပါအဝင် လက်နက်ခဲယမ်း အများအပြား ရရှိခဲ့တယ်လို့ ထုတ်ပြန်ချက်မှာ ဖော်ပြပါတယ်။
ရှမ်းမြောက် တိုက်ပွဲတွေ အတွင်း မြေပြင်တပ်တွေ အထိနာနေတဲ့ စစ်ကောင်စီက လေကြောင်းကို အဓိက အသုံးပြုနေရာ တိုက်ပွဲနေရာတွေ သာမက ပြည်သူတွေ နေထိုင်တဲ့ နေရာတွေကိုပါ အကြောင်းမဲ့ ပစ်ခတ်နေတယ်လို့ ဆိုပါတယ်။
ရှမ်းမြောက် ၁၀၂၇ စစ်ဆင်ရေး စတင်ခဲ့ပြီး နောက်ပိုင်း ကရင်နီပြည်နယ်၊ စစ်ကိုင်းတိုင်းနဲ့ ချင်းပြည်နယ်၊ ရခိုင်ပြည်နယ်တို့မှာလည်း ဟန်ချက်ညီ စစ်ဆင်ရေးတွေ ပေါ်ပေါက်လာခဲ့ပါတယ်။
ညီနောင်မဟာမိတ် ၃ ဖွဲ့က ရှမ်းမြောက် ၁၀၂၇ စစ်ဆင်ရေးကနေ တစ်နိုင်ငံလုံး ပါဝင်တဲ့ စစ်ဆင်ရေးကြီး တစ်ရပ် အဖြစ် ကူးပြောင်းကြဖို့ တော်လှန်ရေး အင်အားစုတွေကို တိုက်တွန်းထားပါတယ်။
Mk-007
#MeKongNews
#ရှမ်းမြောက်
#ကိုးကန့်_MNDAA
#အတွဲလိုက်ဒုံး
