မဲခေါင်၊ နိုဝင်ဘာ ၁၀

ရှမ်းပြည်နယ် မြောက်ပိုင်း၊ ကိုးကန့် ကိုယ်ပိုင်အုပ်ချုပ်ခွင့်ရဒေသက စစ်တပ်စခန်း ၄ ခုကို မနေ့က ထပ်မံ သိမ်းပိုက်ပြီးနောက် စစ်ကောင်စီတပ်စခန်းပေါင်း ၁၃၀ ခန့် သိမ်းပိုက်ထားနိုင်ပြီလို့ MNDAA ပြန်ကြားရေးက မနေ့က ထုတ်ပြန်လိုက်ပါတယ်။

‘၁၀၂၇ စစ်ဆင်ရေး’ ၁၄ ရက်မြောက်ဖြစ်တဲ့ နိုဝင်ဘာ ၉ ရက်မှာ မြောက်ပိုင်းညီနောင် မဟာမိတ်တပ်ဖွဲ့တွေဟာ ကိုးကန့်ခရိုင်၊ ရှီးရှမ်းဒေသ၊ တာရွှေထန်အုပ်စု၊ နမ်ကော်ရွာမှာ ဖုန်းရွှေရှမ်နေရာကြား၊ ရှောက်ပယ်အိုင်မှာရှိတဲ့ စစ်ကောင်စီတပ်စခန်းနဲ့ ရှီယွင်ကြည်ရွာအနီး၊ ဟဲ့ဟုတ်တောင် စခန်းတွေကို ထိုးစစ်ဆင်ခဲ့တယ်လို့ ဆိုပါတယ်။

အဆိုပါ ထိုးစစ်ဆင် တိုက်ပွဲအတွင်း ရှောက်ပယ်အိုင် စစ်တပ်စခန်း၊ ဟဲ့ဟုတ်တောင်အနီးက စစ်ကောင်စီ ခံစစ်တောင်ကုန်း တစ်ခု၊ ဗျူဟာကုန်းနဲ့ အရံတပ်စခန်းတွေကို သိမ်းပိုက်နိုင်ခဲ့တယ်လို့ MNDAA ကပြောပါတယ်။

စစ်ကောင်စီဘက်က လေကြောင်းပစ်ကူတွေနဲ့ ဆက်တိုက် တိုက်ခိုက်နေတဲ့ကြားက အဆိုပါ တပ်စခန်းတွေကို အလုံးစုံ သိမ်းပိုက်နိုင်ခဲ့တယ်လို့ ဆိုပါတယ်။

ဒါ့အပြင် စစ်ကြောင်းထိုးနေစဥ်အတွင်း ဟွာရှိပန်ဘက်က တက်လာတဲ့ စစ်ကား ၂ စီးကို လမ်းမှာ ကြားဖြတ် တိုက်ခိုက် ဖျက်ဆီးနိုင်ခဲ့ပြီး စစ်ကောင်စီ လက်အောက်ခံ ကိုးကန့် ရုပ်သေးအုပ်ချုပ်ရေး အဖွဲ့ဝင်တွေကို ရှင်းလင်းနိုင်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

MNDAA အနေနဲ့ ကွမ်းလုံတံတား၊ တာပါး(သံလွင်)တံတား၊ တာပါးတု လှေဆိပ်ကမ်းတွေကိုလည်း ထိန်းချုပ်နိုင်ခဲ့ တာကြောင့် ကိုးကန့်နဲ့ မုံးကိုးခရိုင်၊ မိုင်းကျက်ဒေသကို တိုက်ရိုက် ဆက်သွယ် သွားလာနိုင်ပြီလို့ ဆိုပါတယ်။

လက်ရှိ စစ်ရေးအရ ကွမ်းလုံမြို့ကို ညီ‌နောင်မဟာမိတ်တပ်တွေ ထိန်းချုပ်နိုင်ပြီ ဖြစ်တာကြောင့် မြို့ကြီးဖြစ်တဲ့ လောက်ကိုင်မြို့ကို မကြာမီ သိမ်းပိုက်နိုင်‌တော့မယ်လို့ ရှမ်းနိုင်ငံရေး လေ့လာသူတွေက သုံးသပ်ထားပါတယ်။

ရှမ်းမြောက်ဒေသ နည်းတူ စစ်ကိုင်းတိုင်း အတွင်းက ကောလင်း၊ ခမ်းပတ်၊ ပင်လည်ဘူး မြို့တွေကို ပြည်သူ့ ကာကွယ်ရေး ပူးပေါင်းတပ်ဖွဲ့တွေ ထိန်းချုပ်ထားပြီး ဖြစ်သလို ထီးချိုင့် အပါအ၀င် တခြားမြို့တွေကို သိမ်းပိုက်ဖို့ ဆက်လက် တိုက်ခိုက်နေတယ်လို့ စစ်ရေးသတင်းရင်းမြစ်တွေထံက သိရပါတယ်။

MK-007

#MekongNews

#ကိုးကန့်_ခရိုင်

#ဗျူဟာကုန်း

#MNDAA

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)