မဲခေါင် ၊ ဒီဇင်ဘာ ၂၁
နှစ်ဖက်အပစ်ခတ်ရပ်စဲရေး သဘောတူညီချက် လက်မှတ်ရေးထိုးမှုရဲ့ သဘောတူညီချက်အရ ရှမ်းပြည်ပြန်လည်ထူထောင်ရေးကောင်စီ (RCSS) နဲ့ ပတ်သက်ဆက်နွယ်သူ ၅ ဦးကို ပြန်လည်လွှတ်ပေးခဲ့တယ်လို့ ရှမ်းပြည်တိုးတက်ရေးပါတီ (SSPP) က ဒီနေ့မှာ သတင်းထုတ်ပြန်ပါတယ်။
ရှမ်းတပ် ၂ ခု စည်းလုံးညီညွတ်မှုကို ဖော်ဆောင်တဲ့အနေနဲ့ နှစ်ဖွဲ့ရေးထိုးထားတဲ့ သဘောတူညီချက်အရ တိုက်ပွဲအတွင်းက ဖမ်းမိထားတဲ့သူတွေကို ပြစ်ဒဏ်မှ လျော့ပေါ့လွတ်ပေးခဲ့တာဖြစ်တယ်လို့ ထုတ်ပြန်ချက်မှာဖော်ပြထားပါတယ်။
SSPP က ဖမ်းဆီးထားတဲ့ RCSS နဲ့ ဆက်နွယ်သူ ၅ ဦးကို အထွေထွေအတွင်းရေးမှူး ၂ ဗိုလ်မှူးကြီး စိုင်းဆုက SSPP ကိုယ်စား ဒီကနေ့မှာ ပြစ်ဒဏ်မှ လွတ်ပေးခဲ့တာဖြစ်ပြီး အဲ့ဒီလွတ်ပေးလိုက်တဲ့သူတွေကိုလည်း ရှမ်းတပ် ၂ ဖွဲ့ရဲ့ အပစ်ခတ်ရပ်စဲရေးအကြောင်းကို ရှင်းပြခဲ့တယ်လို့ SSPP ကဆိုပါတယ်။
ဒါ့အပြင် RCSS နဲ့ SSPP ကြား အပစ်ခတ်ရပ်စဲမှု သဘောတူညီချက်အရ သဘောညီထားတဲ့ အချက် ၉ ချက်ကိုလည်း ရှင်းပြခဲ့ပြီး ပြစ်ဒဏ်မှုလွတ်မြောက်လာသူတွေအတွက် လမ်းခရီးစရိတ်ကိုပါ ထုတ်ပေးခဲ့တယ်လို့ SSPP ကဆိုပါတယ်။
RCCSS နဲ့ SSPP အဖွဲ့တို့ရဲ့ နှစ်ဖက်တပ်ဖွဲ့များ အပစ်ခတ်အရပ်စဲရေး သဘောတူညီမှု အချက် ၉ ချက်အနက် ဖမ်းဆီးထားတဲ့ နှစ်ဖက်အဖွဲ့နဲ့ ပတ်သက်ဆက်နွယ်သူတွေကို ပြန်လွတ်ပေးရေးဟာလည်း တစ်ချက်အပါအဝင်ဖြစ်ပါတယ်။
ဒီကနေ့ SSPP မှ ပြန်လွတ်ပေးလိုက်တဲ့ RCSS နဲ့ ပတ်သက်ဆက်နွယ်သူ ၅ ဦးမှာ စိုင်းဖြူ ၃၃ နှစ်၊ စိုင်းမိုင် ၃၃ နှစ်၊ စိုင်းမိန်း ၃၂၊ စိုင်းစု ၄၆ နှစ် နဲ့ စိုင်းဆိုင်ဖ ၂၈ နှစ်တို့ဖြစ်တယ်လို့ SSPP ရဲ့ ထုတ်ပြန်ချက်အရသိရပါတယ်။
CJ-002
#MeKongNews
#RCSS
#SSPP
#အပစ်ရပ်
#ပြန်လွှတ်
#သဘောတူ
