မဲခေါင်၊ မတ် ၁၈
ရုရှားအစိုးရဟာ ယူကရိန်းကျူးကျော်စစ်တစ်နှစ်ကျော်လာချိန် လက်နက်ခဲယမ်းမလောက်ငှမှု ပြဿနာကြောင့် အများအပြားဝယ်ယူနိုင်ဖို့ မြန်မာစစ်အစိုးရဆီပါ ကမ်းလှမ်းဆွေးနွေးနေတယ်လို့ ယူကရိန်းစစ်ထောက်လှမ်းရေး ဒုတိယရာထူးအကြီးဆုံးဖြစ်တဲ့ ဗာဒင်စကီဘစ်စကီးက မတ် ၁၇ ရက်နေ့မှာ ထုတ်ပြန်ခဲ့ပါတယ်။
စကီဘစ်စကီးက “ရုရှားဟာ လက်နက်ခဲယမ်းမလုံလောက်မှုကို စိုးရိမ်မှုဖြစ်နေရပါပြီ။ သူတို့ လက်နက်ခဲယမ်း တွေရနိုင်သမျှ အများအပြားဝယ်ဖို့ အီရန်နဲ့ချိတ်ဆက်လုပ်ဆောင်နေတယ်။ မြန်မာစစ်ခေါင်းဆောင်တွေနဲ့လည်း ဒီအရေး ဆွေးနွေးမှုတွေ လုပ်နေကြပြီ။ အာဖရိကနဲ့ အရှေ့အလယ်ပိုင်းနိုင်ငံတွေဆီကလည်း လက်နက်ခဲယမ်းတွေ ဝယ်ဖို့ အသည်းအသန် ကြိုးစားနေတာ ကျွန်တော်တို့ သိထားပါတယ်။ သူတို့ စစ်တပ်၊ နိုင်ငံခြားထောက်လှမ်းရေး အဖွဲ့နဲ့ အေဂျင်စီတွေကို ဒီနိုင်ငံတွေဆီ စေလွှတ်ပြီး ရနိုင်သမျှ လက်နက်ခဲယမ်းတွေ ဝယ်ဖို့ လုပ်နေကြတာပါ” လို့ ရှင်းလင်းပြောကြား သွားခဲ့ပါတယ်။
ယူကရိန်းစစ်မြေပြင်မှာ ရုရှားတပ်တွေ ပျက်ဆီးဆုံးရှုံးမှုများလို့ ပြီးခဲ့တဲ့ရက်ပိုင်းတွေအတွင်း စတာလင်ခေတ် ၁၉၄၅ ခုနှစ်ထုတ် BTR-50 တင့်ကားတွေကိုတောင် စတင်ထုတ်သုံးလာရပြီလို့ ဗြိတိန်ထောက်လှမ်းရေးသတင်းရင်းမြစ်က ဖော်ထုတ်ရေးသားခဲ့ပါတယ်။
မတ်လ ၁၆ ရက်နေ့နောက်ပိုင်းကာလအတွင်းမှာပဲ ရုရှားရဲ့ ခေတ်မီတင့်ကားဖြစ်တဲ့ T-90 M တင့်ကား ၁၅ စီး ယူကရိန်းစစ်မြေပြင်မှာ ပျက်ဆီးဆုံးရှုံးခဲ့ရကြောင်း၊ ဒါကြောင့် လက်နက်ခဲယမ်း လိုအပ်ချက်တွေကို ကမ္ဘာက မြင်သာစေပြီး ပေါင်းသင်းလို့ရမယ့် နိုင်ငံငယ်တွေဆီက လက်နက်ဝယ်ဖို့ ရုရှားသမ္မတ ပူတင်က စေခိုင်းထားတာဖြစ်တယ်လို့ ယူကရိန်းစစ်ဘက်ဆိုင်ရာလက်နက်နှင့်အသုံးအဆောင်များ လေ့လာရေးစင်တာ အကြီးအကဲ အန်ဒရေးရူဒစ်ခ်က ရှင်းလင်းပြောကြားခဲ့ပါတယ်။
MKF – 001
Ref: rmx.news
