မဲခေါင်၊ မတ် ၁
သားအငယ် ၂ ယောက်လုံးကို တစ်သက် ပြန်မတွေ့ရတော့တဲ့ နှစ်ရှည်ထောင်ဒဏ်ချတဲ့ တရားရုံးနဲ့ ရဲဌာနကို အထူး ကျေးဇူးတင်ကြောင်း ကားမှာ ရုပ်ရှင်ဆိုင်းဘုတ် ကြော်ငြာသလို ဗွီနိုင်းကြီးချိတ်ပြီး မြို့ပတ်နေတဲ့ ဖခင်တစ်ဦးရဲ့ အဖြစ်အပျက် တကယ်ဖြစ်ပျက်ခဲ့ပါတယ်။
ထိုင်းနိုင်ငံ၊ နောင်ဟန်ရဲစခန်းက အမှုကို စိစစ်ပြီး ယူဒွန်သာနီ တရားရုံးက ဖေဖော်ဝါရီ ၂၃ ရက်နေ့မှာ ဖခင်ကို သတ်ဖို့ ကြိုးစားခဲ့တဲ့ သား ၂ ယောက်ကို တစ်ယောက်က ၂၅ နှစ်၊ တစ်ယောက်က ၃၃ နှစ်ရှိတဲ့ နှစ်ရှည် ထောင်ဒဏ်တွေ ချမှတ်လိုက်တာ ဖြစ်ပါတယ်။
အမှုအသွားအလာ ကတော့ အသက် ၈၀ ရှိပြီဖြစ်တဲ့ ဖခင်ကြီး အူအိုင်ကာပရာဒစ်ဟာ မြေပမာဏ ၃၂,၀၀၀ ကုဗမီတာ ပိုင်ဆိုင်ပြီး သား ၄ ယောက်ရှိတဲ့အနက် အငယ် ၂ ယောက်က အမွေအဖြစ် မြေကွက်ခံစားခွင့် တောင်းတာကို မပေးလို့ ပထမတစ်ကြိမ် အိမ်လာပြီး လေးခွနဲ့ပစ်ကာ ဒုတိယတစ်ကြိမ်မှာ ပုစိန်နဲ့ပါ အသေခုတ်သတ်ဖို့ ကြိုးစားခဲ့တာ ဖြစ်တယ်လို့ ဆိုပါတယ်။
သားတစ်ဦးဖြစ်တဲ့ ပရီးဒါးက သူ့ညီငယ် ၂ ယောက်ဖြစ်တဲ့ ဘန်လန်းနဲ့ ဘွန်ချန်းတို့ဟာ ဖခင်ကို သတ်ဖို့ကြိုးစား လို့ အပြန်အလှန် သတ်ပုတ်ကြရင်း အားလုံး ဒဏ်ရာတွေ အသီးသီးရခဲ့ကြကြောင်း၊ မနှစ်က စက်တင်ဘာ ၈ ရက်နေ့မှာ လူသတ်ဖို့ ကြိုးစားမှု ဖြစ်ခဲ့တာဖြစ်ကြောင်း KhaoSod သတင်းက ဖော်ပြပါတယ်။
ဒါကြောင့် သား ၂ ယောက်ကို စီရင်ချက်ချပြီးချိန်မှာ ဖခင်ကာပရာဒစ်က ဗွီနိုင်းပေါ် “နောင်ဟန်ရဲတပ်ဖွဲ့နဲ့ ယူဒွန်သာနီ တရားရုံးကို ကျေးဇူး အထူးတင်ပါတယ်။ သားတွေအတွက် ကံကြီးထိုက်မှုဟာ နောင်ဘ၀ မကူးခဲ့ဘူး” ဆိုတဲ့ စာသားရေးပြီး တရားရုံး၊ ရဲစခန်းနဲ့ အိမ်အနီးအနား တစ်ဝိုက် ကားနဲ့ပတ်မောင်း နေခဲ့တာ ဖြစ်ပါတယ်။
သတင်းသမားတွေက ထောင်ဒဏ် ၃၃ နှစ်ကျသွားတဲ့ ဘွန်ချန်ရဲ့ ဇနီးသည် ဆန်သနီကို အင်တာဗျူးမှု မှာတော့ အထက်က ဖော်ပြပါ အကြောင်းတရားတွေနဲ့ မကိုက်ညီဘဲ စွဲချက်တွေဟာ မမှန်ကန်ဘူးလို့ ဖြေကြားခဲ့ပြီး အသေးစိတ်ကိုတော့ မပြောပြခဲ့ပါဘူး။
ဆွေမျိုးလည်း တော်စပ်တဲ့ အိမ်နီးချင်း ဆူနန် ဆိုသူက ဘွန်ချန်ဟာ လူကောင်းလူတော် တစ်ယောက် ဖြစ်ကြောင်း၊ ဖခင်ဖြစ်သူကို အမြဲ ငွေကြေးရှာဖွေ ထောက်ပံ့ခဲ့ကြောင်း၊ ပြဿနာ မတက်မီ ဖခင်ကို ဘွန်ချန်က ဘတ် ၆၀,၀၀၀ အထိ ပေးခဲ့တာကို မိန်းကလေးငယ်တွေနဲ့ ဖောက်ပြန်ပျော်ပါးခြင်းနဲ့ ကုန်စေခဲ့လို့ ဖခင်ကို ပြောမိရာက ဒေါသထွက်ခံရတာဖြစ်ကြောင်း၊ နောက်ဆုံး ဖြစ်စဉ်က နေမကောင်းတဲ့ မိခင်ကို ညီအစ်ကို ၂ ယောက် တွေ့ခွင့်ရဖို့ မိဘအိမ်အသွား ပေးမဝင်လို့ အစ်ကိုတော်သူ ပရီးဒါး၊ ဖခင်ဖြစ်သူတို့နဲ့ ရန်ဖြစ်ကြတာ ဖြစ်တယ်လို့ ဖွင့်ဟ ပြောကြားခဲ့ပါတယ်။
Ref: thethaiger
MKF-001
#MeKongNews
#ထိုင်းနိုင်ငံ
#နောင်ဟန်ရဲစခန်း
#KhaoSod
