မဲခေါင်၊ ဇန်နဝါရီ ၂၄
မြန်မာ စစ်ကောင်စီကို ဂျပန်အစိုးရ ဖွံ့ဖြိုးရေးထောက်ပံ့ကူညီမှုအစီအစဉ်အဖြစ် ဂျပန်ကုမ္ပဏီ Yokogawa Bridge Corp က ဒေါ်လာ ၁ သန်းကျော်ပေးခဲ့တဲ့အပေါ် Human Rights Watch (HRW)အဖွဲ့က ဇန်နဝါရီ ၂၃ ရက်နေ့မှာ ဝေဖန်ကန့်ကွက်ချက်တစ်စောင် ထုတ်ပြန်ခဲ့ပါတယ်။
အဆိုပါ ဂျပန်ကုမ္ပဏီက ၂၀၂၂ ခုနှစ် ဇူလိုင်လကနေ နိုဝင်ဘာလအတွင်း ရန်ကုန်မှာရှိတဲ့ ပဲခူးမြစ် တံတားစီမံကိန်းအတွက် ဒေါ်လာ ၁.၃ သန်းကို စစ်ကောင်စီပိုင် Myanmar Economic Corporation (MEC)ဆီ ပေးအပ်ခဲ့ကာ ဂျပန် Mizuho Bank ကနေ မြန်မာနိုင်ငံခြားကုန်သွယ်မှုဘဏ်က MEC ဘဏ်စာရင်းထဲ ဆက်တိုက် ထည့်ပေးနေခဲ့တာလို့ HRW က ဆိုပါတယ်။
ဂျပန်နိုင်ငံတကာပူးပေါင်းဆောင်ရွက်ရေး အေဂျင်စီ (JICA ) ကနေတစ်ဆင့် မြန်မာနိုင်ငံဟာ ဂျပန်အစိုးရဆီက ချေးငွေ ယန်း ၃၁ ဘီလီယံ (ဒေါ်လာ သန်း ၂၄၀) ကို ချေးဖို့ ၂၀၁၆ ခုနှစ်က လက်ခံသဘောတူခဲ့တာဖြစ်ပြီး ဒီစီမံကိန်းမှာ ပဲခူးမြစ်ကူးတံတားစီမံကိန်းလည်းပါဝင်တဲ့အတွက် ဒေါ်လာ ၁.၃ သန်းကို စစ်ကောင်စီဆီ ၂၀၂၂ ခုနှစ်က ပေးအပ်ခဲ့လို့ HRW က ပြင်းပြင်းထန်ထန် ဝေဖန်ချက်ထုတ်ပြန်ခဲ့တာ ဖြစ်ပါတယ်။
HRW အာရှပရိုဂရမ်အရာရှိ တက်ပိုင်ကာဆာအီက “Yokogawa Bridge Corp ကနေ ဖြတ်ပြီး စစ်ကောင်စီရဲ့ MEC ဆီ ဝင်ငွေကူညီထည့်ဝင်ပေးခဲ့တယ်။ ဂျပန်အစိုးရအနေနဲ့ ရက်စက်ကြမ်းကြုတ်လွန်းပြီး စစ်ရာဇဝတ်မှုတွေ၊ လူသားချင်းမစာနာတဲ့ ရာဇဝတ်မှုတွေ ကျူးလွန်နေတဲ့ မြန်မာစစ်တပ်ကို ကုမ္ပဏီတွေကပဲ ဖြစ်ဖြစ်၊ အစိုးရဆီကပဲဖြစ်ဖြစ် အကျိုးစီးပွားဖြစ်စေမယ့် ထောက်ပံ့မှုလုပ်တာမျိုးတွေ နောက်ထပ်မရှိအောင် သေချာ ပိတ်ပင်သင့်တယ်။ လူသားချင်းစာနာမှုဆိုင်ရာအကူအညီမဟုတ်တဲ့ ကူညီမှုတွေကို စစ်တပ်ဆီ မရောက်စေဖို့ သေချာပိတ်ပင်သင့်တယ်” လို့ ဆိုပါတယ်။
Ref:HRW
MKF-001
