မဲခေါင်၊ ဇူလိုင် ၃၀
ဇူလိုင် ၂၇ ရက်နေ့က အီရန်ထောက်ပံ့၊ ဟားမက်စ်နဲ့မဟာမိတ် ဟစ်ဇ်ဘိုလာတပ်ဟာ လက်ဘနွန်တောင်ပိုင်းကနေ အစ္စရေးသိမ်းပိုက်ထားတဲ့ ဂိုလန်ကုန်းမြင့်က ဘောလုံးကွင်းထဲ ဒုံးကျည်နဲ့ပစ်ခတ်လို့ ကလေးအပါ လူငယ်ချည်း ၁၂ ဦးသေဆုံးခဲ့ရတာကြောင့် အစ္စရေးတပ်ဟာ ဟစ်ဇ်ဘိုလာကို လက်ဘနွန်ထဲအထိ ဝင်တိုက်မယ့် အလုံးစုံစစ်ပွဲဆင်နွှဲဖို့ ဇူလိုင် ၂၈ ရက်မှာ အရေးပေါ် စစ်ရေးအစည်းအဝေး ဆင့်ခေါ်ခဲ့ပါတယ်။
အောက်တိုဘာ ၇ ရက် အစ္စရေးနဲ့ဟားမက်စ် စစ်ပွဲစဖြစ်စတည်းက ဟစ်ဇ်ဘိုလာတပ်ဟာ အစ္စရေးနယ်ထဲကို ဒုံးကျည်တွေနဲ့ ဆက်တိုက်ပစ်ခတ်တိုက်ခိုက်နေခဲ့ပြီး အစ္စရေးဘက်ကလည်း နောက်ပိုင်း နယ်စပ်ကနေ လက်ဘနွန်နိုင်ငံအတွင်းပိုင်းထဲအထိ ပစ်ခတ်တိုက်ခိုက်မှုတွေ လုပ်လာခဲ့တာကြောင့် လက်ဘနွန်ရောက် နိုင်ငံသား တွေအားလုံး အမြန်နိုင်ငံထဲက ထွက်ကြဖို့ ကမ္ဘာ့နိုင်ငံအသီးသီးက သတိပေးချက် ထုတ်ပြန်ထားပါတယ်။
ဒီအခြေအနေကြောင့် အစ္စရေးဘက်က လက်ဘနွန်နိုင်ငံအတွင်းပိုင်းထဲ ပစ်ခတ်တိုက်ခိုက်မှုကို ရပ်စိုင်းထားချိန် ဂိုလန်ကုန်းမြင့်ဒေသ ဒုံးကျည်ပစ်ခတ်မှုနဲ့သေဆုံးမှုကြောင့် အစ္စရေးဝန်ကြီးချုပ် နက်တန်ယာဟုဟာ အမေရိကန် ခရီးစဉ်ကနေ တတ်သုတ်ပြန်လာပြီး လက်ဘနွန်နိုင်ငံအတွင်းပိုင်းထဲအထိ ဟစ်ဇ်ဘိုလာတပ်တွေကို ဝင်ရောက်လို့ အလုံးစုံ စစ်ပွဲအဖြစ် တိုက်ခိုက်ဖို့ စီစဉ်နေကြောင်း သတင်းတွေ ထွက်ပေါ်လာပါတယ်။
အစ္စရေးနိုင်ငံခြားရေးဝန်ကြီး အစ္စရယ်ကတ်ဇ်က ဟစ်ဇ်ဘိုလာရဲ့ လုပ်ရပ်ဟာ သတ်မှတ်မျဉ်းနီကို ကျော်လွန်သွား ခဲ့ပြီဖြစ်လို့ လက်စားချေမှုဟာ အလုံးစုံစစ်ပွဲအသွင်ဆောင်သွားလိမ့်မယ်လို့ အစည်းအဝေးအပြီး ထုတ်ပြန်သွားခဲ့ပြီး နက်တန်ယာဟုကိုယ်တိုင်ကလည်း ကြီးမားသော သွေးကြေး ပြန်ပေးဆပ်ရမယ်လို့ ခံပြင်းစွာ ပြောဆိုခဲ့လို့ အီရန် အပါ အရှေ့အလယ်ပိုင်းဒေသက စတဲ့ တတိယကမ္ဘာစစ်ဖြစ်ဖို့ နောက်ထပ် ခြေတစ်လှမ်း ရှေ့ဆက်တိုးသွားတာပဲ ဖြစ်တယ်လို့ နိုင်ငံတကာက သုံးသပ်နေကြပါတယ်။
ဟစ်ဇ်ဘိုလာတပ်မှာ စစ်သည်အင်အား ၃၀၀၀၀ နဲ့ ၅၀၀၀၀ ကြားရှိပြီး ဒုံးကျည်နဲ့ ရော့ကတ် ၁၂၀၀၀၀ ကနေ ၂၀၀၀၀၀ ရှိကာ ဒါတွေကို အီရန်က အဓိက ထောက်ပံ့ပေးထားတာဖြစ်ပါတယ်။
Ref:Thesun
MKF-001
