မဲခေါင်၊ မေ ၂၉
မြောက်ကိုရီးယားဟာ နယ်စပ်ကနေ စွန့်ပစ်အမှိုက်နဲ့ အညစ်အကြေးတွေပါတဲ့ ပူပေါင်း အလုံး ၂၀၀ ကျော်ကို တောင်ကိုရီးယားဘက် လွှတ်တင်ကျရောက်စေပြီး စော်ကားခဲ့တယ်လို့ တောင်ကိုရီးယား စစ်ဦးစီးချုပ်များရုံးက မေ ၂၉ ရက်နေ့မှာ ထုတ်ပြန်သွားပါတယ်။
မြောက်ကိုရီးယားဟာ ၂၀၁၆ ခုနှစ်နဲ့ ၂၀၁၈ ခုနှစ်တွေမှာလည်း ဒီလို မိုးပျံပူပေါင်းတွေနဲ့ အမှိုက်တွေကို တောင်ကိုရီးယားဘက် လွင့်မျောကျရောက်စေတာမျိုး လုပ်ခဲ့ပေမယ့် မေ ၂၉ ရက် ညသန်းခေါင်းကျော် နံနက် ၁ နာရီကျော် ကတည်းက စံချိတ်တင်အရေအတွက်နဲ့ ပူပေါင်း ၂၀၀ ကျော်မှာ စွန့်ပစ်အမှိုက်တွေ၊ စက္ကူစုတ်တွေ၊ တိရစ္ဆာန် စွန့်ပစ်အညစ်အကြေးတွေပါ ထည့်ပြီး တောင်ကိုရီးယားဘက်ကို လေကြောင်းသင့်ချိန် လွှတ်တင်ခဲ့တာဖြစ်ပါတယ်။
အရင်က တောင်ကိုရီးယားကို ထွက်ပြေးခိုလှုံတဲ့ မြောက်ကိုရီးယားကွန်ဆာဗေးတစ်တွေ၊ တောင်ကိုရီးယားက တက်ကြွလှုပ်ရှားသူတွေဟာ ကင်ဂျုံအန်အာဏာရှင်စနစ်ကို တွန်းလှန်ကြဖို့ တိုက်တွန်းတဲ့ လက်ကမ်းစာစောင် တွေကို တောင်ကိုရီးယားနယ်စပ်ဘက်ကနေ ပူပေါင်းနဲ့လွှတ်တင်လေ့ရှိပါတယ်။
ဒီလုပ်ရပ်တွေကြောင့် မြောက်ကိုရီးယားနယ်စပ်မှာ စက္ကူစုတ်တွေ ပျံ့ကျဲနေလို့ တန်ပြန်တဲ့အနေနဲ့ အမှိုက်တွေကို ပြန်ပို့လိုက်တာဖြစ်ကြောင်း မြောက်ကိုရီးယားဘက်က ထုတ်ပြန်သွားပါတယ်။
တောင်ကိုရီးယား စစ်ဦးစီးချုပ်များရုံးက မြောက်ကိုရီးယားလုပ်ရပ်ဟာ လူမဆန်၊ အောက်တန်းကျတဲ့လုပ်ရပ်လို့ ထုတ်ပြန်ကာ အမှိုက်ဘောလုံးတွေကျရောက်ခြင်းဟာ ၂၀၁၆ ခုနှစ်က အိမ်တွေ၊ ကားတွေ ပျက်ဆီးမှုရှိခဲ့လို့ အနားမသွားဘဲ သတင်းပို့ကြဖို့ သတိပေးချက်ထုတ်ပြန်ထားပါတယ်။
ပြီးခဲ့တဲ့တစ်ရက်က မြောက်ကိုရီးယားဟာ ပိတ်ပင်ထားမြစ်ထားတဲ့ တိုက်ချင်းပစ်ဒုံးကျည်အသုံးပြုပြီး စပိုင်ဂြိုဟ်တု လွှတ်တင်ခဲ့ရာမှာ လေပေါ်မှာပဲ ပေါက်ကွဲပျက်ဆီးသွားလို့ တောင်ကိုရီးယား၊ ဂျပန်နဲ့ အမေရိကန်တို့က ကုလသမဂ္ဂ လုံခြုံရေးကောင်စီစည်းမျဉ်း ချိုးဖောက်တာလို့ ဝေဖန်ရှုတ်ချမှုတွေ လုပ်ခဲ့ကြပါသေးတယ်။
Ref: yna
MKF-001
