မဲခေါင်၊ ဒီဇင်ဘာ ၂၈

မြောက်ကိုရီးယားအာဏာရှင်ခေါင်းဆောင် ကင်ဂျုံအန်ဟာ နှစ်သစ်ကူးနေ့မှာ နိုင်ငံအနာဂတ်မူဝါဒနဲ့ပတ်သက်လို့ မိန့်ခွန်းပြောဆိုရေးအတွက် သူ့ရဲ့ အလုပ်သမားပါတီ မူဝါဒဆိုင်ရာအကြီးအကဲတွေနဲ့ဒီရက်ထဲ အစည်းအဝေးတွေ ဆက်တိုက်ကျင်းပပြုလုပ်နေရာမှာ အမေရိကန်ရဲ့ မကြုံစဖူး ခြိမ်းခြောက်မှုခံနေရချိန်ဖြစ်လို့ နျူကလီးယားအပါ အဝင်လက်နက်ခဲယမ်းတွေပိုထုတ်ပြီး စစ်ပွဲအတွက် ပြင်ဆင်မှုအဆင့်တွေကိုလည်း တိုးမြှင့်သထက် တိုးမြှင်သွားဖို့ မှာကြားခဲ့ကြောင်း မြောက်ကိုရီးယားအစိုးရသတင်းဌာန KCNA က ထုတ်ပြန်ရေးသားသွားပါတယ်။

ကင်ဂျုံအန်ဟာ မြောက်ကိုရီးယားပြည်သူ့တပ်မတော်အတွက် လက်နက်ခဲယမ်း၊ နျူကလီးယားလက်နက်၊ ပြည်သူ့ ကာကွယ်ရေးကဏ္ဍ၊ စစ်ပွဲအတွက် တိုးမြှင့်ပြင်ဆင်မှုစတဲ့ မဏ္ဍိုင် ၄ ရပ်ကို တည်ဆောက်ထားပြီး ထုတ်လုပ်မှုအားလုံး၊ စစ်ပြင်မှုအားလုံးကို အရှိန်မြှင့်သထက်မြှင့်တင်ခိုင်းနေကာ အမေရိကန်နဲ့စစ်ဖြစ်လာရင် အသင့်ရှိဖို့လိုကြောင်း အစည်းအဝေးမှာ မှာကြားသွားတာဖြစ်ပါတယ်။

ဒါ့အပြင် ၁၉၉၀ အငတ်ဘေးဆိုက်မှု၊ မကြာသေးခင် ဆယ်စုနှစ်တွေအတွင်း ရာသီဥတုကပ်ဆိုးကြောင့် နိုင်ငံစားနပ်ရိက္ခာအထွက်နှုန်းကျဆင်းခြင်း၊ ကုန်ထုတ်လုပ်မှုကျဆင်းခြင်းတွေကို ၅ နှစ်စီမံကိန်းနဲ့ပြုဲပြင်တည်ဆောက် ခြင်းဟာ ဒီနှစ် နောက်ဆုံးနှစ်ဖြစ်လို့ ရည်မှန်းချက်အထမြောက်အောင် ပိုကြိုးစားအားထုတ်ဖို့၊ စစ်ရေးနဲ့ စီးပွားရေး အားသာမှုရှိအောင် ကျူးကျော်မှုတွန်းလှန်နိုင်ငံတွေနဲ့ မဟာမိတ်ပိုဖွဲ့စည်းပြီး အမေရိကန်နဲ့မဟာမိတ်တွေကို တွန်း လှန်ဖို့၊ စိုက်ပျိုးရေးအထွက်နှုန်းတည်ငြိမ်မြင့်တက်ဖို့ အကောင်းဆုံးမူဝါဒတွေကို ချမှတ်သွားဖို့ ကင်ဂျုံအန်က အစည်းအဝေးမှာ တိုက်တွန်းမှာကြားသွားတာဖြစ်ပါတယ်။

၂၀၂၃ ခုနှစ်အထိ မြောက်ကိုရီးယားစိုက်ပျိုးရေးထွက်ကုန်တွေ တိုးတက်လာတာမှန်ပေမယ့် ကိုဗစ်မှာ နယ်စပ်တွေ ပိတ်ခဲ့မှု၊ အထွက်နှုန်းက ပြည်သူစားသုံးဖို့ လုံလောက်ခြင်းမရှိမှုတွေကို ရင်ဆိုင်နေရဆဲဖြစ်တယ်လို့ တောင်ကိုရီးယားဘက်ကတော့ တွက်ဆ သုံးသပ်ထားပါတယ်။

Ref: indiatoday
MKF-001

#MeKongNews

#မြောက်ကိုရီးယား

#အမေရိကန်

#နျူကလီးယား

#ကင်ဂျုံအန်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)