မဲခေါင်၊ ဇွန် ၂၀
မေ ၁၈ နဲ့ ၁၉ ရက်တွေမှာ ၂၄ နှစ်အတွင်း မြောက်ကိုရီးယားနိုင်ငံကို ပထမဆုံးအကြိမ် ရောက်ရှိလာခဲ့တဲ့ ရုရှားသမ္မတပူတင်ရဲ့ ယူကရိန်းအပေါ် အလုံးစုံကျူးကျော်စစ် ဆင်နွှဲမှုအပေါ် မြောက်ကိုရီးယားခေါင်းဆောင် ကင်ဂျုံအန်က အလုံးစုံထောက်ခံ အားပေးကြောင်း ရုရှား သတင်းအေဂျင်စီတွေဖြစ်တဲ့ Tass နဲ့ RIA Novosti တို့ထံ ပြောကြားလိုက်ပါတယ်။
ပူတင်ဟာ ကင်ဂျုံအန်နဲ့ အရေးအပါဆုံး မဟာမိတ်ဖွဲ့ပြီး ယူကရိန်းစစ်ပွဲအတွက် အစုလိုက်အပြုံလိုက်ရှိတဲ့ အမြောက်ဆံနဲ့ ဒုံးကျည်တွေကို မြောက်ကိုရီးယားဘက်ကနေ ယူသုံးနေတဲ့အပြင် အခုလို မြောက်ကိုရီးယားနိုင်ငံကို ကိုယ်တိုင် လာရောက်ခြင်းအားဖြင့် စစ်ရေးမှာ ကူရာကယ်ရာ မရှိရှိတာ ရှာနေရတဲ့အထိ အကျပ်ရိုက်နေတာ ဖြစ်ကြောင်း အမေရိကန်ဘက်က သုံးသပ်ချက်ထုတ်ပြန်ခဲ့ပါတယ်။
ဒါပေမယ့် ကင်ဂျုံအန်ဟာ ပူတင်နဲ့ ပြုံယမ်းမြို့ မှာ အမိုးပွင့်ကားနဲ့အတူ လှည့်လည်စဥ် ပြည်သူသိန်းချီကို ပူတင်ဓာတ်ပုံတွေ၊ ရုရှားအလံတွေ ဝေ့ယမ်းစေပြီး ဂုဏ်ပြုခံခဲ့သလို နိုင်ငံပိုင်သတင်းစာကနေ ရုရှားနဲ့ မြောက်ကိုရီးယား မဟာမိတ်ပူပေါင်းမှု ထပ်မံတိုးမြင့်ခြင်းစာချုပ်ဟာ ဘယ်တုန်းကမှ မရှိဖူးတဲ့ ရင်းနှီးမှုအသွင်ဆောင်ခဲ့ပြီး ခေတ်သစ်တစ်ခု ပွင့်လင်းလာခြင်းဖြစ်ကြောင်း ပြောခဲ့ပါတယ်။
နှစ်နိုင်ငံ စစ်ရေးအရ ပူးပေါင်းခြင်းဟာ ဘယ်သူမှ ဖျက်ဆီးမရတဲ့ ရေရှည်ညီညွတ်မှုကို ဖြစ်စေခဲ့ကြောင်း၊ ယူကရိန်းကျူးကျော်စစ်မှာ ရုရှားနိုင်ငံ၊ ရုရှားစစ်တပ်၊ ရုရှားပြည်သူအားလုံး ဘက်ကနေ အပြည့်အ၀ ထောက်ခံရပ်တည်ပြီး ဒီမဟာမိတ်အဆင့် ထပ်တိုးခြင်းဟာ အမြန်ဆုံး ဆိုးရွားလာပြီး ပြောင်းလဲလာတဲ့ ကမ္ဘာ့အခင်းအကျင်း အရေးပါတဲ့ ကမ္ဘာ့တည်ငြိမ်ရေး မဟာဗျူဟာကျတဲ့ ပူးပေါင်းမှုဖြစ်ကြောင်း ထုတ်ဖော်ပြောဆို သွားပါတယ်။
မြောက်ကိုရီးယားကို ကုလသမဂ္ဂလုံခြုံရေးကောင်စီက နျူကလီးယားလက်နက် ဆက်လက်အဆင့်မြှင်တင် ထုတ်လုပ်နေလို့ ပိတ်ဆို့အရေးယူမှု လုပ်ထားတာ ကြာပြီဖြစ်လို့ နိုင်ငံတံခါးပိတ်ဝါဒ ကျင့်သုံးတဲ့အတွက် အထီးကျန်နေချိန် ယူကရိန်း ကျူးကျော်စစ်ကြောင့် အမေရိကန်နဲ့ အနောက်မဟာမိတ်တွေရဲ့ ပိတ်ဆို့အရေးယူမှုခံနေရတဲ့ ရုရှားတို့ အပြန်အလှန်မှီခိုဖို့၊ နျူကလီးယားစွမ်းရည် ပိုမိုမြှင့်တင်ပြီး ကမ္ဘာကိုခြိမ်းခြောက်ဖို့ အခုလို ပူးပေါင်းကြတာဖြစ်ပြီး ရုရှားစစ်ဘက်ဆိုင်ရာ အကြီးအကဲတွေ ဆက်တိုက်ဆိုသလို မြောက်ကိုရီးယားကို လာရောက်ခဲ့ခြင်းက နျူးကလီးယားလက်နက် အဆင့်မြှင့်တင်မှုနဲ့ လက်နက်လိုအပ်ချက်ကို မီးမောင်းထိုးပြနေကြောင်း ကျွမ်းကျင်သူတွေက သုံးသပ်နေကြပါတယ်။
Ref: telegraphindia
MKF-001
