မဲခေါင်၊ ဖေဖော်ဝါရီ ၈
ယူကရိန်းဘက်ခ်မတ်မြို့ကို ဗဟိုပြုတဲ့တိုက်ပွဲ စစ်မျက်နှာပြင်မှာ ဖေဖော်ဝါရီ ၆ ရက်နေ့ တစ်ရက်ထဲနဲ့ ရုရှားစစ်သား ၁၀၃၀ ဦး ကျဆုံးခဲ့တယ်လို့ ယူကရိန်း ကာကွယ်ရေးဝန်ကြီး ရက်ဇ်နီကော့ဗ်က ထုတ်ပြန်ပြောဆိုပါတယ်။
ရုရှားစစ်တပ်ဟာ နေရာစုံဖြန့်ကျက်တိုက်ခိုက်မှုဗျူဟာ မအောင်မြင်လို့ စစ်နယ်မြေအနည်းငယ်ကိုသာရွေးချယ်ပြီး အင်အားအလုံးအရင်းနဲ့ အသေခံတိုက်ခိုက်လာတယ်လို့ ဆိုပါတယ်။
ဘက်ခ်မတ်မြို့တိုက်ပွဲမှာ ရုရှားစစ်သားတွေဟာ ယူကရိန်းခံစစ်ထဲရောက်ဖို့ ပေ ၃၀ နီးတဲ့အထိ အသက်စွန့်တိုက်ခိုက်ကြလို့ အခုလို အသေအပျောက်များရတာဖြစ်တယ်လို့ ယူကရိန်းဘက်က ထုတ်ပြန်ထားပါတယ်။
ယူကရိန်းဘက်က တပ်ဖြန့်ခြင်းထက် ကျူးကျော်ခံရတဲ့ တစ်နှစ်ပြည့် ဖေဖော်ဝါရီ ၂၄ ရက်မှာ အဓိကစစ်မျက်နှာပြင်တွေကို အင်အားအလုံးအရင်းနဲ့ ပြန်တိုက်ဖို့အသင့်ဖြစ်နေပြီလို့ ရက်ဇ်နီကော့ဗ်က ဆိုပါတယ်။
ပူတင်ရဲ့ အတွေ့အကြုံမရှိတဲ့ စစ်သားတွေ အသားလွတ်အသေခံတိုက်စေတဲ့ ဗျူဟာကို ယူကရိန်းဘက်က ပူတင်ရဲ့အသားကြိတ်စက်လို့ နာမည်ပေးထားပြီး တပ်မဖြန့်ဘဲ တပ်စုပြီး အလုံးအရင်းတိုက်ခိုက်တာတောင် ဘက်ခ်မတ်မြို့မှာ တစ်ပတ်အတွင်း မီတာ ၁၀၀ လောက်ပဲ ရှေ့တိုးသိမ်းပိုက်နိုင်တယ်လို့ ဆိုထားပါတယ်။
ဖေဖော်ဝါရီ ၆ ရက် တစ်နေ့တာ အနီးကပ်တိုက်ပွဲမှာ ရုရှားစစ်သည် ၁၀၃၀ ဦးကျဆုံးပြီး တင့်ကား ၂၈ စီး၊ အမြောက်စင်တစ်ခု၊ ဆီဖြည့်ယာဉ်သုံးစီး၊ အထူးစစ်ရေးအသုံးပြုယာဉ် ၅ စီး ပျက်စီးခဲ့တယ်လို့ ယူကရိန်းဘက်က ထုတ်ပြန်ပါတယ်။
ရုရှားဘက်က ဇန်နဝါရီလအတွင်း ယူကရိန်းစစ်သား ၆၅၀၀ ကို သုတ်သင်၊ ဖမ်းဆီးနိုင်ခဲ့တယ်လို့ ကြေညာခဲ့ပေ မယ့် ကျဆုံးမှုကိုတော့ ထုတ်ပြန်ခြင်းမရှိသေးပါဘူး။
ယူကရိန်းဘက်ကတော့ ရုရှားတွေ ကျူးကျော်ခဲ့မှုတစ်နှစ်အတွင်း စစ်သားပေါင်း ၁၃၃၁၉၀ ဦး ကျဆုံးခဲ့တယ်လို့ ထုတ်ပြန်ထားပါတယ်။
MKF-001
#MeKongNews
