မဲခေါင်၊ ဇန်နဝါရီ ၂၃
စိန့်ပီတာရင်ပြင်မှာ ဇန်နဝါရီ ၂၂ ရက်က ပြုလုပ်ခဲ့တဲ့ ယေရှုလူ့ဇာတိခံယူခြင်း နဲ့ မယ်တော်မာရီ ကိုးကွယ်ဆုတောင်းခြင်းအခမ်းအနားမှာ ပုပ်ရဟန်းမင်းကြီး ဖရန်ဆစ်က မြန်မာ၊ ယူကရိန်း၊ ပီရူးနဲ့ ကင်မရွန်းနိုင်ငံတွေမှာ အကြမ်းဖက်သတ်ဖြတ်မှုတွေရပ်ပြီး ငြိမ်းချမ်းစေဖို့ အနူးအညွတ် ပန်ကြားကာ ဆုတောင်းစကား ပြောကြားခဲ့ပါတယ်။
မြန်မာနိုင်ငံမှာ စစ်ကောင်စီက နေရာဒေသအနှံ့အပြား ဘာသာရေးအဆောက်အအုံတွေကို ပစ်မှတ်ထား ဗုံးကြဲ တိုက်ခိုက်နေပြီး မကြာသေးခင်ကပဲ သက်တမ်းအရင့်ဆုံး ကက်သလစ်ဘုရားကျောင်းဖြစ်တဲ့ ချမ်းသာရွာ ဘုရားကျောင်းကို ဗုံးကြဲခဲ့တဲ့ဖြစ်စဥ်ရှိခဲ့ပါတယ်။
သာသနာပိုင်ပုဂ္ဂိုလ် တွေကို ဖမ်းဆီးမှုနဲ့ အရပ်သားပြည်သူများစွာကို တိုက်ခိုက်သတ်ဖြတ်မှုတွေ ရှိနေခဲ့တဲ့အတွက် ပုပ်ရဟန်းမင်းကြီးက ပွဲတော်တက်ရောက်လာသူအားလုံး ကို မြန်မာပြည်ငြိမ်းချမ်းရေး ဆုတောင်းပေးဖို့ အနူးအညွတ် တောင်းဆို မှာကြားသွားခဲ့တာ ဖြစ်ပါတယ်။
ပုပ်ရဟန်းမင်းကြီးက မြန်မာပြည်မှာ ခံစားနေရတဲ့ ပြည်သူတွေနဲ့ နီးကပ်စွာရှိ နေကြောင်း၊ ပဋိပက္ခအသွင်ကနေ ခွင့်လွှတ်ခြင်း၊ ချစ်ခြင်း၊ ငြိမ်းချမ်းခြင်းဆီ ကူးပြောင်းဖို့ မယ်တော်မာရီ ဆီ ဆုတောင်းပေးကြဖို့ မိန့်ကြားခဲ့တာဖြစ်ပါတယ်။
ဆက်လက်ပြီး ရုရှားကျူးကျော်စစ်ကို တစ်နှစ်ကြာနီးပါး တောင့်ခံရင်း သေကြေပျက်စီးမှုများပြားနေရတဲ့ ယူကရိန်း၊ တောင်အမေရိကနိုင်ငံ ပီရူးမှာ သမ္မတ ဆင်းပေးဖို့ ဆန္ဒပြတောင်းဆိုနေတဲ့ပြည်သူတွေကို နှိမ်နင်းရာမှာ သေကြေမှုများစွာဖြစ်နေတဲ့ အခြေအနေတွေရှိပါတယ်။
အဲ့ဒီ့ အခြေအနေတွေကို စေ့စပ်ညှိနှိုင်းပြီး ဖြေရှင်းဖို့၊ အင်္ဂလိပ်စကားသုံး ဒေသနဲ့ ကင်မရွန်းစကားသုံး ဒေသတွေအကြား ပဋိပက္ခဖြစ်ပြီး လူပေါင်း ၆၀၀၀ ကျော် အသတ်ခံရပြီးဖြစ်တဲ့ ကင်မရွန်းမှာရော ငြိမ်းချမ်းစေဖို့ ပုပ်ရဟန်းမင်းကြီးက တိုက်တွန်းနှိုးဆော်ခဲ့ပါတယ်။
Ref: vaticannews
MKF-001
