မဲခေါင်၊ နိုဝင်ဘာ ၂

အထီးကျန်ဆန်စွာ သီးခြားနေထိုင်နေတဲ့ အာဏာရှင်ကင်ဂျုံအန်ရဲ့ မြောက်ကိုရီးယားနိုင်ငံဟာ မှုတွေသာ တိုးတိုးနေလို့ နိုင်ငံတကာသံတမန်ဆက်ဆံရေး ကဏ္ဍအပေါ် ဖြတ်တောက်မှုအဖြစ် ကမ္ဘာတစ်ဝန်းမှာ ဖွင့်ထားတဲ့ သံရုံး တစ်ဒါဇင်အထိကို မကြာမီပိတ်သိမ်းသွားဖို့ စီစဉ်နေပြီဖြစ်ကြောင်း တောင်ကိုရီးယားနိုင်ငံ ပေါင်းစည်းရေးဝန်ကြီးဌာနက အောက်တိုဘာ ၃၁ ရက်နေ့မှာ ထုတ်ပြန်ခဲ့ပါတယ်။

အောက်တိုဘာ ၃၀ ရက်နေ့မှာပဲ မြောက်ကိုရီးယားနိုင်ငံပိုင် မီဒီယာ KCNA က သူတို့ သံအမတ်တွေကို အန်ဂိုလာနဲ့ ယူဂန္ဓာနိုင်ငံက ခေါင်းဆောင်တွေနဲ့ သွားရောက်နှုတ်ဆက်ပြီး သံရုံးပိတ်ပြန်လာကြဖို့ စီစဉ်ပေးခဲ့တဲ့အကြောင်း တရားဝင် ထုတ်ပြန်ပါတယ်။ မြောက်ကိုရီးယားဟာ ပုံမှန် ဆက်ဆံမှုအဖြစ် ၁၅၉ နိုင်ငံနဲ့ ဆက်ဆံပြီး သံတမန်မစ်ရှင်ဆက်ဆံရေးအဖြစ် သံရုံးသွားဖွင့်ပြီး ဆက်ဆံတဲ့ နိုင်ငံ ၅၃ နိုင်ငံသာ ရှိပါတယ်။

ဒါပေမဲ့ နျူကလီးယားတိုးမြှင့်ထုတ်လုပ်နေမှုနဲ့ပတ်သက်လို့ တစ်ကမ္ဘာလုံးက မြောက်ကိုရီးယားကို ပိတ်ဆို့အရေး ယူမှုတွေ ဆက်တိုက်လုပ်နေခြင်းဟာ မျှော်လင့်သလို သံတမန်ဆက်ဆံရေးကနေ ဘာအကျိုးပြုမှုမှ မပေးနိုင်တဲ့ အတွက် ကင်ဂျုံအန်ဟာ ပလဲပနံသင့် အစဉ်အလာအရ သံတမန်ဆက်ဆံရေးလုပ်တဲ့ နိုင်ငံတွေလောက်မှာသာ သံရုံးဆက်လက်ထားရှိပြီး စပိန်၊ ဟောင်ကောင် နဲ့ အာဖရိကနိုင်ငံအများအပြားမှာ သံရုံးတွေကို ပိတ်ခိုင်းထားတာ ဖြစ်ပါတယ်။

စပိန်ဟာ မြောက်ကိုရီးယားကို ပိတ်ဆို့အရေးယူတဲ့နိုင်ငံထဲပါဝင်တဲ့အတွက် နိုဝင်ဘာ ၁ ရက်နေ့မှာ ပဲ မက်ဒရစ်မြို့မှာ အခြေစိုက်တဲ့ မြောက်ကိုရီးယားသံရုံးကို ကင်ဂျုံအန်က ပိတ်ခိုင်းကြောင်း စာရွက်စာတမ်း အထောက်အထားတွေ ထွက်ပေါ်လာပြီဖြစ်ပါတယ်။

တစ်ဒါဇင်လောက်ရှိတဲ့ နိုင်ငံတကာသံရုံးတွေကို ပိတ်ခြင်းဟာ မြောက်ကိုရီးယားအတွက် နိုင်ငံတကာ သံတမန် ဆက်ဆံရေးရှိရင်းစွဲထဲက ၂၅ ရာခိုင်နှုန်းကို ပိတ်သိမ်းတာဖြစ်လို့ ဒီလုပ်ရပ်ဟာ နိုင်ငံစီးပွားရေးကျပ်တည်းလွန်းနေ တဲ့ မြောက်ကိုရီးယားကို ပိုပြီး ဆိုးရွားကျပ်တည်းသွားစေဖို့သာ ရှိကြောင်း မြောက်ကိုရီးယား ဗဟိုပြု ဝက်ဘ်ဆိုက် NK Pro ထူထောင်သူ ချက်ဒ်အိုကာရိုးက သုံးသပ်သွားပါတယ်။

Ref: tbsnews
MKF-001

#MeKongNews

#မြောက်ကိုရီးယား

#သံရုံး

#ပိတ်ပင်

#အဆက်ဖြတ်

#နိုင်ငံတကာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)