မဲခေါင်၊ ဖေဖော်ဝါရီ ၂၁
ငလျင်ဒဏ်ပြင်းပြင်းထန်ထန်ခံထားရတဲ့ တူရကီ – ဆီးရီးယား နယ်စပ်မှာ မနေ့ည ဒေသစံတော်ချိန် ၈နာရီ ၄မိနစ်(မြန်မာစံတော်ချိန် ည ၁၂နာရီခန့်)က အင်အားပြင်းငလျင်ထပ်လှုပ်လို့ အနည်းဆုံး လူ ၃ဦး သေဆုံးတယ်လို့ သိရပါတယ်။
ငလျင်ပြင်းအားဟာ ၆ ဒဿမ ၄ မဂ္ဂနီကျုရှိပြီး တူရကီနိုင်ငံ တောင်ဘက်အစွန်ဆုံးပြည်နယ် ဟက်တိုက် အနီးနားတဝိုက်ကို ဗဟိုပြုလှုပ်ခတ်ခဲ့တာဖြစ်ပြီး ဒီလှုပ်ခတ်မှုဟာ လူ ၅သောင်းနီးပါးသေဆုံးတဲ့ အင်အားပြင်း ငလျင် ၂ခုဆက်တိုက်လှုပ်ခဲ့ပြီးတဲ့ ၂ပတ်အကြာမှာ ထပ်မံလှုပ်ခတ်တာပါ။
ဒီလှုပ်ခတ်မှုကြောင့် လူ ၃ဦးသေဆုံးပြီး လူ ၂၀၀ကျော်ဒဏ်ရာရတယ်လို့ တူရကီပြည်ထဲရေးဝန်ကြီး စူလေမန်ဆွိုက်လုက ပြောပါတယ်။
ဟက်တိုက်ဒေသဟာ မြေထဲပင်လယ်နဲ့ထိစပ်တဲ့နေတာကြောင့် အဲဒီဒေသကလူတွေကို ကမ်းရိုးတန်းနဲ့ဝေးရာမှာနေဖို့လည်း သဘာဝဘေးအေဂျင်စီက ထုတ်ပြန်ထားပါတယ်။
အဲဒီငလျင်လှုပ်ခတ်အပြီး နောက်ဆက်တွဲ ၅ ဒဿမ ၈ ပြင်းအားရှိတဲ့ နောက်ဆက်တွဲငလျင်တစ်ခုလည်း လှုပ်ခတ်ခဲ့သေးတယ်လို့ တူရကီသဘာဝဘေးအေဂျင်စီက ထုတ်ပြန်ထားပါတယ်။
#MeKongNews
#တူရကီ
#ဆီးရီးယား
#ငလျင်
Ref: BBC
