စစ်ခေါင်းဆောင် မင်းအောင်လှိုင်ကို ရာထူးမှနုတ်ထွက်ရန်နှင့် ဒီမိုကရေစီနည်းကျ ရွေးကောက်ခံအစိုးရကို အာဏာပြန်အပ်ရန် ကုလသမဂ္ဂ၏ မြန်မာနိုင်ငံဆိုင်ရာအထူးကိုယ်စားလှယ် ခရစ္စတင်း ရှရန်နာ ဘာ့ဂ်နာက သောကြာနေ့တွင် တောင်းဆိုလိုက်သည်။
“ကာကွယ်ရေးဦးစီးချုပ် ဦးဆောင်မှုအောက်မှာ မြန်မာနိုင်ငံရဲ့အနာဂတ်ကို တည်တည်ငြိမ်ငြိမ်နဲ့ ရှင်သန်နိုင်မယ်လို့ ကျွန်မမမြင်ပါဘူး” ဟု လူ့အခွင့်အရေးကိစ္စရပ်များကို ရင်ဆိုင်ဖြေရှင်းသည့် ကုလသမဂ္ဂအထွေထွေညီလာခံ၏ ကော်မတီကို မစ္စ ဘာ့ဂ်နာကပြောသည်။
“မြန်မာနိုင်ငံရဲ့အနာဂတ်ကို ဗိုလ်ချုပ်မှူးကြီး မင်းအောင်လှိုင်ကသာ တကယ်ဂရုစိုက်တယ်ဆိုရင် ရာထူးကနေနုတ်ထွက်ပြီး မြန်မာနိုင်ငံသားတွေရဲ့ ဆန္ဒနဲ့အညီ အာဏာကို အရပ်သားအစိုးရလက် ပြန်အပ်ရမှာပါ” ဟုလည်း ပြောသည်။
ထိုသို့လျှောက်ထားပြောဆိုမှုကို သူ၏ကုလသမဂ္ဂနောက်ဆုံး တင်ပြမှုတွင်ပြောဆိုခြင်း ဖြစ်ပြီး ဘာ့ဂ်နာက တာဝန်တွင် ၃ နှစ်ခွဲထမ်းဆောင်ပြီးနောက် အောက်တိုဘာ ၃၁ ရက်တွင် အနားယူမည်ဖြစ်သည်။
ပြီးခဲ့သည့် ၉ လအတွင်း အာဏာသိမ်းမှုကြောင့် မြန်မာနိုင်ငံတွင် အာဏာသိမ်းမှုကြောင့် ပရမ်းပတာဖြစ်မှုများနှင့် အကြမ်းဖက်မှုများကြောင့် အထိအခိုက်များကို သူကလေ့လာခဲ့သည်။
အာဏာသိမ်းပြီးနောက် အရပ်သား ၁၁၀၀ ကျော်သေဆုံးခဲ့ပြီး ထောင်ချီထောင်ဒဏ်ကျခံနေရသည့်အပြင် လူ ၂၅၀၀၀၀ ကျော်နေရပ်စွန့်ခွာနေရသည်။
အာဏာရခေါင်းဆောင် ဒေါ်အောင်ဆန်းစုကြည်၏ NLD ပါတီသောင်ပြိုကမ်းပြိုအနိုင်ရခဲ့သည့် ၂၀၂၀ နိုဝင်ဘာရွေးကောက်ပွဲတွင် မဲမသမာမှုများရှိခဲ့သည်ဟု မြန်မာအကြမ်းဖက်စစ်တပ်က အခိုင်အမာပြောခဲ့သည်။
ထို့နောက် ဒေါ်အောင်ဆန်းစုကြည်၊ သမ္မတ ဦးဝင်းမြင့်နှင့် အခြား NLD အဆင့်မြင့်ပါတီဝင်များကို စစ်တပ်က ဖမ်းဆီးခဲ့ပြီး အစောပိုင်းက ငြိမ်းချမ်းစွာဆန္ဒထုတ်ဖော်မှုများကို ဖြိုခွင်းမှုများစခဲ့သည်။
အခြေအနေကို မူလအတိုင်း ပြန်လည်ထိန်းသိမ်းရန် နိုင်ငံတကာဖိအားများကို စစ်တပ်က လျစ်လျူရှုထားပြီး အခြေအနေများလည်း ဖြည်းဖြည်းချင်းပိုဆိုးလာသည်။
နိုင်ငံတဝန်းတွင် အကြမ်းဖက်မှုများရှိလာပြီးနောက် NLD ၏ အမျိးသားညီညွတ်ရေးအစိုးရ NUG ကလည်း ကိုယ်ပိုင် ပြည်သူ့ကာကွယ်ရေးတပ်ဖွဲ့ဖွဲ့စည်းခဲ့သည်။
“မြန်မာနိုင်ငံဟာ ဆင်းရဲတွင်းထဲမြန်မြန်သွားနေပြီးတော့ လာမယ့်နှစ်တွေမှာ ကြုံရမယ့် အရှိန်အဟုန်မြင့် စိန်ခေါ်မှုတွေနဲ့ယှဉ်ရင် အခုလုပ်ဖို့လိုတဲ့ အနစ်နာခံမှုတွေက နောက်တနေရာကိုရောက်သွားမှာက ပေးဆပ်ရမှာပိုနည်းပါတယ်” ဟုလည်း သူက သောကြာနေ့တွင်ပြောသည်။
အာဏာသိမ်းမှုမတိုင်ခင်က မြန်မာနိုင်ငံတွင် လူ ၁၀ သိန်း လူသားချင်းစာနာထောက်ထားမှု အကူအညီများ လိုအပ်ခဲ့ပြီး ဖေဖော်ဝါရီနောက်ပိုင်းတွင် ထိုပမာဏသည် သိန်း ၃၀ ခန့်အထိမြင့်တက်လာပြီး ကျန်းမာရေးနှင့် ဘဏ်လုပ်ငန်းများပြိုနေသည့်အပြင် အလုပ်လုပ်မဲ့မှုလည်း မြင့်တက်နေသည်။
